CORTES, Bohol (PIA) — Usa ka hotline ang gibuksan sa Department of the Interior and Local Government (DILG) alang sa tanang mga isyu nga may kalambigitan sa coronavirus disease (COVID-19) ug sa pagtubag sa hagit sa mga lokal nga opisyales sa Bohol, matud ni Provincial Director Jerome Gonzales.
Didto sa Kapihan sa PIA, matud ni Gonzales nga ang COVID 19 Hotline: 0912 7208913 alang lamang sa text ug dili mahimong tawagan.
Hinuon, pahinumdom sa DILG nga kadtong motext sa ilang mga pangutanan, kahasul ug kabalaka, lakip ana ang ilang reklamo kinahanglang magbutang sa kompleto nga pangalan, kompleto nga address lakip na ang sitio, purok, barangay ug lungsod o syudad, kay kini nga mga detalye gikinahanglan aron ma validate sa DILG.
Pasumpay ni Gonzales, kadtong mga pangutana nga walay kompleto nga detalye, dili nila aksyonan.
Hinuon mipasalig usab ang DILG ngadto sa mga Bol-anon nga ang mga pangalan ug kontak numbers ilang isipon nga confidential, gawas lamang kon gikinahanglan gayud nga ibutyag.
DILG HOTLINE magsumpay sa mga reklamo sa katawhan ngadto sa mga opisyales kabahin sa pagpatuman sa mga lakang batok sa pagkuyanap sa coronavirus disease. (PIA-Bohol)
Kini nga hotline nakadedicate lamang sa pagtubag sa mga COVID19-related issues ug sa mga suliran kalabut sa mga opisyales sa lalawigan sa Bohol.
Dugang ni PD Gonzales, ang mga pangutana, isyu ug concerns nga wala na sa lalawigan sa Bohol mahimo nga ipaagi na usab niining link nga: https://www.facebook.com/419363814918885/posts/1313558895499368/.
Sa laing bahin, kadtong reklamo sa Social Amelioration Program (SAP) ug sa pagpatuman niini, gitambagan nga moduol sa Grievance Committee nga naa nahimutang sa CSWDO ug sa MSWDO.
Ang Grievance Committee gimanduan na nga modawat sa mga reklamo ug motubag sa mga suliran nga gipadangat ilabi na kon kabahin sa amelioration program.
Gawas sa Grievance Committee, mahimo usab nga mokontak sa DSWD VII Hotlines: (032) 233-8785, (032) 233-0261, (032) 231-2172 o 09171530289 / 09189122813 o pinaagi sa ilang Facebook Page @dswdfo7 o i-click ang https://ereklamo.dswd.gov.ph/.
Alang sa mga stranded Filipino Seafarers nga nia sa Pilipinas, mahimo kamo nga mokontak sa Malasakit Help Desk pinaagi sa pag-email sa pid_stcw@marina.gov.ph, o kontaka ang MHD gamit ang Landline: 8844-3195; Globe: 0927-957-4103; Smart: 0999-530-1794; Sun: 0933-122-2815 o subaya sa ilang Facebook Page @DOTrMARINAPH sa dugang kasayuran.
Sa mga stranded Boholanos, mahimo nga mokontak sa Provincial Government of Bohol pinaagi sa Facebook Page @provincialgovtBOHOL alang sa hinabang o pinaagi sa Hotlines (038) 411 0138 / 09515202408.
Pahinumdom dalang hangyo usab sa DILG, kon magpadayag sa mga concerns ug mokomentaryo sa mga posts sa DILG, unta sundon ang maayong pamatasan ug dili makig-away sa mga mikomentaryo didto.
Matud sa DILG, tungod sa ilang kakuwangan, mahimo nga ang imong pangutana, ila usab nga irefer ngadto sa ubang ahensya nga natungdan. (rahc/PIA-7/Bohol)