Ang Tawag

Ni Padre Jose “joesum” Sumampong, Jr

Ika-Unom nga Domingo human sa Pagkabanhaw (A)
Mayo 17, 2020

Si Jesus miingon sa iyang mga tinun-an, ¹⁵“Kon nahigugma kamo kanako, tumana ninyo ang akong mga sugo. ¹⁶Mangayo ako sa Amahan, ug hatagan kamo niyag laing Manlalaban, ang Espiritu sa kamatuoran, aron makig-uban kaninyo hangtod sa kahangturan. ¹⁷Ang kalibutan dili makadawat kaniya, kay dili man kini makakita ni makaila kaniya. Apan nakaila kamo kaniya kay nag-uban siya ug nagpuyo diha kaninyo.

¹⁸“Dili ko kamo pasagdan nga mag-inusara; mobalik ako. ¹⁹Sa dili madugay ang kalibutan dili na makakita kanako, apan makakita kamo kanako; ug kay ako buhi man, mabuhi usab kamo. ²⁰Inig-abot niadtong adlawa, mahibalo kamo nga ako anaa sa Amahan ug kamo ania kanako, ingon nga ako anaa usab kaninyo.

²¹“Ang modawat sa akong mga sugo ug magtuman niini mao ang nahigugma kanako. Ang akong Amahan mahi­gugma kaniya nga nahigugma kanako; ako usab mahigugma kaniya ug magpaila sa akong kaugalingon ngadto kaniya.” Ang Ebanghelyo sa Ginoo.

oOo

KAHULOGAN SA EBANGHELYO (Juan 14:15-21)

¹⁵ Si Jesus miingon sa iyang mga tinun-an, “Kon nahigugma kamo kanako, tumana ninyo ang akong mga sugo.

Human si Jesus makanunayong mihangyo kanato sa “pagtuo” Kaniya, Siya karon mihangyo kanato sa “paghigugma” Kaniya. Atong angayan nga hinumduman nga ang gugma sa kanunay may kalambigitan sa pagsugot (obedience). Ang paghigugma kang Jesus nagkahulogan og pagpaminaw sa Iyang pulong ug sa pagtuman niini (Juan 14:15, 21-24; 15:10, 14).

Dinhi sa atong panahon karon, daw wala na masabti ang hiyas sa pagka-masinugtanon. Wala usab masabti ang kahulogan sa pulong “awtoridad”. Usahay adunay sayop nga pagsabot sa kahulogan niini. Morag kining gisulti ni Jesus, sumala sa bag-ong panan-aw ug panghunahuna, dili na angay sa atong panahon karon. Tinuod ba kaha?

^16aMangayo ako sa Amahan…

Oo, si Jesus hingpit gayod nga mitug-yan sa Iyang kaugalingon ngadto sa Amahan, dili tungod kay Siya gipugos, kondili tungod kay Siya nagbaton man og makanunayong gugma alang sa Amahan. Si Jesus nag-ampo tungod kay ang Iyang pagtagad dili man sa Kaugalingon apan hinoon ngadto gayod sa Iyang langitnong Amahan.

^16bug hatagan kamo niyag laing Manlalaban, ang Espiritu sa kamatuoran…

Si Juan mao lamang ang Ebanghelista nga mitawag sa Espiritu Santo nga Manlalaban (Parakletos). Sa pinulo-ngan nga Griego kini nagkahulogan og “ang tawo nga gitawag aron molaban sa laing tawo atubangan sa hukmanan.” Ang manlalaban may kadugtungan sa kamatuoran.

¹⁷Ang kalibutan dili makadawat kaniya, kay dili man kini makakita ni makaila kaniya. Apan nakaila kamo kaniya kay nag-uban siya ug nagpuyo diha kaninyo.

Niining iyang panapos nga pagpanudlo sa gabii sa wala pa Siya sakita ug patya, si Jesus migamit sa pulong “kalibutan” sulod sa katloan (30) ka higayon. Kining pulong “kalibutan” dili sabton sa iyang naandang kahulogan nga mao ang binuhat nga kalibutang pisikal (created cosmos), o sa kalibutan nga gihisgutan sa mga magsusulat sa kasaysayan.

Apan hinoon, atong sabton ang pulong “kalibutan” nga dili ang kinatibuk-an o apil ang tanan, kondili kadto lamang nagmakuli sa pagdawat sa Dios. Kini mao ang kalibutan nga misira sa iyang kaugalingon kay dili buot nga modawat sa kalagnon gasa. Kini mao ang kalibutan nga nagpabiling buta tungod kay midumili man sa pagsanong sa kamatuoran. Sa maong kalibutan gipahimutang ang dakong babag nga maoy hinungdan ngano nga si Jesus dili makapadayag sa Iyang kaugalingon.

¹⁸“Dili ko kamo pasagdan nga mag-inusara; mobalik ako. ¹⁹Sa dili madugay ang kalibutan dili na makakita kanako, apan makakita kamo kanako; ug kay ako buhi man, mabuhi usab kamo.

Human sa gasa sa Espiritu Santo, si Jesus mopadayag sa Iyang kaugalingon pinaagi sa bag-ong pagka-siya (new presence). Ania dinhi ang pagka-pareho gayod sa katuyoan sa Espiritu Santo ug ni Jesus sa ilang mga pagpadayag ngari kanato. Sa mga magtutuo kinahanglan gayod ang pagtan-aw ug pagkahibalo mahitungod sa Espiritu ug ni Jesus. Kinahanglan nga kining duha atong “higugmaon ug sundon”. Apan ang kalibutan, kadtong midumili sa pagtuo, nagpabilin nga dili modawat niining katingalahan ug balaan nga presensya sa Dios.

Sa mga kalibutanon si Jesus usa lamang ka tawo nga nahisulat sa kasaysayan. Bisan pa kon siya may talagsaong gikatampo alang sa mga katawhan, apan kini Siya, alang kanila, patay na! Wala na siyay dugang pa nga bili. Apan alang niadtong mituo, kini sila makabaton og kinabuhi.

²⁰Inig-abot niadtong adlawa, mahibalo kamo nga ako anaa sa Amahan ug kamo ania kanako, ingon nga ako anaa usab kaninyo.

Sukwahi sa mga nagmagahi sa pagdawat sa Dios, si Jesus mipadayag niining pagkalawom nga misteryo sa iyang labing suod nga paghigugma. Kon kini atong nasabtan, kini nagkahulogan nga walay usa kanato nga nag-inusara. Sa matag usa kanato anaa ang upat: ang Amahan, ang Anak nga si Jesus, ang Espiritu Santo, ug kita o ang matag usa kanato.

Sulayi sa pagdawat ug pagsinati niining atong mga sekretong dinapit. Sulayi ang pagkinabuhi uban kanila. Sulayi sa pakighinabi kanila, sultihi sila uban sa malumong mga pulong.

Ngano nga hulaton pa man nato ang “katapusang panahon” una pa nato makaplagi ug masinati kining maong katingalahang kamatuoran? Ang atong pagtuo nagdapit na kanato sa pagsugod niini bisan pa sa atong paglawig niining kinabuhia.

²¹“Ang modawat sa akong mga sugo ug magtuman niini mao ang nahigugma kanako. ²²Ang akong Amahan mahi­gugma kaniya nga nahigugma kanako; ako usab mahigugma kaniya ug magpaila sa akong kaugalingon ngadto kaniya.”

Sa maka-usa pa ang mensahe sa sinugdan sa Ebanghelyo mao usab ang mensahe sa pagtapos. Kini nagpasabot lamang sa kamahinungdanon sa mensahe nga gipahayag ni Jesus.

Ang paghigugma, ang pagtuman sa mga kasugoan mao ang mga kondisyon nga ang Ginoo mopadayag sa iyang kaugalingon ngadto sa mga tawo.

Gipasidan-an na kitang daan sa Dios! Ang tinuod nga pag-ila sa Dios wala magasukad sa kahibalo nga anaa sa tawhanong galamhan kon dili anaa sa personal nga kasinatian sa buhing Dios. Ang matag usa kanato gihagit sa pagsinati sa Dios niining matanga sa kaalam, ang kaalam kansang sukaranan mao ang paghigugma. Ang matuod nga gugma mao ang pagdumili sa kaugalingon tungod ug alang sa uban.