By Elvira Bongosia, PIA
Nanawagan ang National Grid Corporation of the Philippines (NGCP) sa mga tigpalupad og tabanog nga dili kini himuon duol sa mga poste sa koryente ug transmission lines.
Kini aron malikayan ang power interruption o pagkapalong sa koryente ug aron dili mabutang sa peligro ang kinabuhi sa mga tigpalupad og tabanog kun mosangit sa linya sa koryente.
Subling nanawagan ang NGCP sa publiko kalabot niini ilabi na karon nga daghang na-agni sa pagpalupad og tabanog isip usa sa mga kalingawan karong gipa-ubos sa enhanced community quarantine (ECQ) o general community quarantine (GCQ) ang nagkalain-laing lugar sa nasud tungod sa coronavirus disease (COVID-19) pandemic.
Angay hinumdoman nga kusog ang boltahe sa koryente sa mga transmission lines mao nga posibleng makoryentehan ang tawong nagpalupag og tabanog nga mahimong makaingon sa hinanaling kamatoyon niini.
Gani, bisan ang mga tighaling ubos sa mga linya sa koryente hingpit usab nga gidid-an tungod sa peligro nga mahitabo.
Ang mga tawo nga tigpalupad og tabanog ug tighaling ubos sa mga linya sa koryente nga posibleng makaingon sa power interruption o kadaot sa linya sa koryente mahimong pasakaan og kaso tungod sa paglapas sa Republic Act 11361 o Anti-Obstruction of Power Line Act.
May silot kini nga hangtod 12 ka tuig nga pagkabilanggo ug multa nga dili mo-ubos sa P50,000 mao nga gi-awhag sa NGCP ang tanan sa pag-kooperar alang sa padayong suplay sa koryente. (ecb/PIA7-Bohol)