By Rey Anthony H. Chiu
CORTES, Bohol, (PIA).- Andam ang Technical Education and Skills Development Authority (TESDA) sa Bohol makig-alayon sa ni bisan kinsa nga indibidwal ug kahugpungan nga interesado sa paghitsas sa mga medical frontliners nga kasamtangan nga nakig-sagubang sa corona virus disease (COVID-19) apan walay tukma nga mga personal nga panalipod.
Kini maoy gipadayag ni TESDA Bohol Senior Technical Vocational Training Specialist Carlito Quintano, didto sa Kapihan sa PIA, niadtong Huwebes.
Ang TESDA maoy nag-una nga gitugyanan sa kagamhanan sa pagdumala sa technical ug vocational nga pagbansay alang sa dili pormal nga sistema nga makuha sa kasagaran nga pag-eskwela.
Didto sa Kapihan sa PIA niadtong Huwebes, gibalita ni Quintano nga sukad pa sa pagsugod sa pagdeklara sa Community Quarantine, agi og pagsanong sa panawagan sa kagamhanan nga ihikaw sa mananakod nga kagaw sa COVID ang tawo nga katakdan, dali nga gihunong sa TESDA ang ilang mga pagbansaybansay bisan pa man nga kini naa na sa ilang skedyul.
Sa aktibo nga pagpakigharong sa mga medical frontliners sa kagaw sa matag higayon nga moduol kini sa mga tawo nga gidudahan nga may sakit sa COVID, dako ang posibilidad nga kini sila matakdan kon walay tukmang Personal Protective Equipment (PPE).
Ang PPE, nagpasabut sa mga kagamitan nga isuot sa usa ka medical responder o professional ka aron mapanalipdan siya sa pagkatakod. Samtang daghang matang himan sa pagpanalipod sa lawas, sama sa pagsul-ob og gwantis, face mask, gown, face shields, goggles, coveralls, head cover, rubber boots ug shoe cover.
Sa Bohol, una na nga gipalanog sa mga health authorities ang kakuwang sa PPE dinhi, ilabi na sa gowns, face shields ug face masks.
Samtang ang uban nga PPEs sayun ra nga pangitaon, ang gowns nga dili malagbasan sa mga makatakod nga kagaw maoy usa sa mga gimulo nga walay igo nga tinubdan.
Niini, mitanyag ang TESDA, sanglit may mga trainers sila nga mga mananahi, mahimo nga kon may makig-alayon sa kagamhanan ilabi na sa pagpamalit sa mga gamit ug paghatag sa tukmang patterns alang sa gowns ug cover-alls, ang TESDA andam nga motahi niini.
Kini usab human mingtanyag na usab ang TESDA sa paghimo sa mga face mask (hijaw) dihnag gihimo nga pugos na sa Bohol ang pagsul-ob sa hijaw o face mask sa tanan higayon nga mogawas sa panimalay.
Hinuon, sanglit ang gimbuhaton sa ahensya tua nakatutok sa bagbansay, wala silay sarang nga budget alang sa pagpamalit sa mga materyales nga matahi sa ilang mga dressmaking trainers didto sa Provincial Training Center sa Tubigon ug sa Balilihan, saysay ni Quintano. (rahc/PIA-7/Bohol)