By Rey Anthony H. Chiu
TAGBILARAN CITY, (PIA) — Duha ka langgam sa usa ka bato.
Gawas nga ang pagpanghatag og mga fingerlings sa bangus makadugang sa kinatibuk-an nga tinubdan sa isda ug magpakunhod sa pagpanimpalad sa mga lawod aron pagpanagat, kini usab magtudlo sa mga mangingisda sa pag-atiman sa kalikopan aron mas paspas ug dagko ang tubo sa ilang gibuhi nga isda.
Kini maoy gidahum sa Bohol Provincial Fishery Office sa Bureau of Fisheries and Aquatic Resources (BFAR) uban ni Candido Samijon kinsa nagpahiluna nga matugotan sa BFAR sa pagtugyan sa 4,700 ka bangus fingerlings ngadto sa Kinabag-an Environmental Organization sa lungsod sa Calape, Mayo 26.
Segun pa ni Ana Liza Anib, kinsa maoy Bohol PFO Information Officer, ang bangus fingerlings gikan ra usab sa labing daku nga bangus hatchery sa Central Visayas, ang Central Visayas Multi-Species Nursery Demonstration and Training Center sa Bentig, Calape.
Kini usab samtang gipadayag sa BFAR-7 ang ilang pagpakighiusa sa mga nanagat ilabi na sa panahon sa ting-lisud dala sa medical nga emerhensya nga dala sa Coronavirus disease.
Sa pagpalig-on sa tinubdan sa isda, ug pag-abag sa mga mangingisda nga dili una mopalawod, ang pagtabang niini sa mga bahan nga naghugpong alang usab sa mas maayong pamaagi ug teknolohiya ubay kalikopan usa usab ka tunong nga buot kab-oton sa ahensya, matod pa ni Regional Director Dr. Allan Poquita.
Ang pagtugyan usab sa mga fingerlings, usa ka suporta sa kagamhanan ngadto sa mga komunidad sa mga gagmay nga mga mananagat pinaagi sa programa nga Targeted Actions to Reduce Poverty and Generate Economic Transformation (TARGET) sa BFAR.
Dungan usab niini, gipadayag sa BFAR ang pagyukbo ngadto sa mga mananagat ug sa mga tawo nga anaa sa sektor sa pangisdaan.
Karong buwan sa Mayo, atong gisaulog ang “Farmers’ and Fisherfolk’s Month” diin atong gipahimug-atan ang dakong natampo sa mga mamumuo sa industriya sa pangisdaan ngadto sa pagpuno sa panginahanglan sa pagkaon.
“Taliwala niining krisis nga gisagubang sa atong nasud karong panahona, nagpabilin kamong lig-on aron padayon nga mahatag ang panginahanglanon sa pagkaon alang sa katawhan. Among pagyukbo sa inyong mga sakripisyo, paningkamot ug pakigbisog. Daghang salamat ug sa makausa pa, saludo kami kaninyo,” segun sa pahayag sa BFAR sa ilang Facebook page. (rahc/PIA-7/Bohol)