By Rey Anthony H. Chiu, PIA
TAGBILARAN CITY, (PIA) — Nagpagawas na ang Department of Tourism (DOT) sa mga “Bag-ong Sumbanan” alang sa mga establisemento sa turismo nga nag-tanyag ug katulganan o higdaanan (Accommodation Establishments) nga nagpakita sa daku nga kausaban sa serbisyo nga giisip nga tourism frontline.
Pinaagi sa DOT Memorandum Circular No. 2020-002 nga gilagdaan ni Tourism Secretary Bernadette Romulo-Puyat subay sa Republic Act 11469 o Bayanihan to Heal As One Act ug sa RA 6593 o Tourism Act of 2009, napahimutang ang mga sumbanan aron kagiyanan ang binag-o nga protocols alang sa kasanihan ug kaluwasan ilabi na sa pagpadagan ug pagdumala sa serbisyo nga pangkatulganan ubos sa Bang-ong Normal.
Matud ni DOT Secretary Puyat, “ang bag-ong DOT nga Sumbanan magtubag sa mga gikinahanglang mga kabag-ohan dala sa pagpadagan sa negosyo human sa Coronavirus pandemic.”
Ang komprehensibo nga sumbanan nagtanyag sa mga kabag-ohan sa pagdumala sa ‘accommodation establishments’ (AEs) sa mga departamento sa Pag-atiman sa Bisita (Guest Handling), Reception ug Concierge; Mga Lawak ug pag-atiman niini (Rooms and Housekeeping), Serbisyo sa pagkaon ug ilimnon (Food and Beverage); Paglimpyo sa kusina ug pagpamatay kagaw (Kitchen Sanitation and Disinfection) Pagdumala sa mga lugar tapokanan (Public Areas), Panakyanan (Hotel and Transport Service), Engineering and Maintenance Service; pagdumala sa mga bansay pangnegosyo (Business Practices and Management) ug sa pagdumala sa tighatud og mga lutoonon nga pagkaon ug mga serbisyo (Suppliers of Goods and Services).
Partikular sa mga napausab nga pamaagi mao ang ubos sa Section 5, o ang Guest Handling Policy, diin ang establisemento kinahanglan nga mopapirma sa mga guests sa Health Declaration Form dungan sa pagcheck in, pag-aghat sa online payment sa panahon sa booking; ug maghimo sa pagtataw sa body temperature pinaagi sa thermal scanner sa mga entrada sa hotel alang sa tanan nga guests nga mosulod ug kini himoon sa usa ka gibansay nga medical staff o trabahante sa hotel.
Kadto lamang nga mga guests nga miagi sa screening ang tugotan nga makasulod sa hotel aron maka check-in.
Matag guests usab hatagan sa mga pahinumdom sama sa: dili magpaambit sa pagkaon, personal o dili personal nga kabtangan, tukma nga pag-tipig sa nagamit na nga PPE, pagpakigsagol sa uban nga okupante sa mga lawak didto, pagbansay sa saktong paagi sa pagpanghunaw, pagpang-ubo ug panhatsing, gamit sa hijaw o face mask ug ang estrikto nga pagtubay sa physical o social distancing.
Lakip na usab sa mga napabag-o sa Sumbanan mao ang pag-aghat sa tanan sa physical distancing, pagpanghunaw, pagpang-ubo ug pangatsi, pagpasul-ob og masks sa front desk personnel ngadto sa mga bisita, paggamit sa gwantis nga ikalabay human magamit na kon mogunit sa kwarta, o mga dokumento ug mga materyales nga ipasapasa sa front desk.
Walay nay tugotan pa nga maglamano, ug hulip niini ang bansay sa Filipino Brand of Service (FBS) o ang “Mabuhay” samtang nag-abiabi sa pagabut sa guests, basta wala nay hikapay pa nga mahitabo.
Sa mga accommodation establishments, single ug double room occupancy na lamang ang tugotan. Hinuon, kon bana ug asawa, o kapamilya nga nagpuyo sa usa ka balay, tugotan sila sa double o twin occupancy rooms basta idistansya ang mga katre 1-2 metros nang haw-ang.
Alang sa mga bisita nga nagpakita og timailhan sa sakit, ibutang una sila sa holding room samtang wala pa ikapahiluna, pag refer sa guests ngadto sa labing duol nga ospital, ipaseguro ang tabang sa bisita kon may mamatikdan nga timaan sa hilanat sip-on ug ubo ug pagpasulod sa bisita nga walay gipakita nga simtomas sa sulod lamang sa iyang lawak hangtud nga makuha na siya sa tukmang bahan aron madala sa ospital.
Niini, ang taga hotel mao nay mopahibaw sa doctor on duty o sa emergency response team aron makatabang sa pagpadala niini sa ospital.
Ang bag-ong sumbanan nagdili usab sa staff ug personnel sa paghatag og pinihig nga pagtagad sa bisita nga may sakit tungod lang sa kahadlok nga matakdan.
Sa mga lugar nga gideklara nga Community Quarantine, kadtong accommodation establishments magsubay gayud niining Administrative Order No. 2020-002 o ang Community Quarantine Guidelines for Hotel Operations samtang abagan sa New Normal Health and Safety Guidelines, segun sa DOT. (rahc/PIA-7/Bohol)