By Elvira Bongosia, PIA
Dili tugotan ni Presidente Rodrigo Duterte ang pagbukas sa mga klase sa tibuok nasod hangtod wala pay bakuna batok sa coronavirus disease (COVID) 19.
Sa iyang televised public address niadtong Lunes sa gabii, Mayo 25, miingon ang presidente nga dili siya mosugot nga mag-uban sa lawak-tunghaan ang mga estudyante hangtod nga makasiguro nga luwas sila sa hulga sa sakit.
Matud pa sa Presidente, dili niini ibutang sa peligro ang kaluwasan sa mga tinun-an samtang wala pay bakuna alang sa COVID-19
Kini samtang nanghinaot si Duterte nga may bakuna na nga madiskobrehan, sa dili pa man matapos rong tuiga.
Kahinumdoman nga una nang gipahibalo sa Department of Education (DepEd) nga sa Agosto 24 na magbukas ang klase alang sa School Year 2020 – 2021.
Apan gipasabot ni Kalihim Harry Roque, ang tigpamaba sa Malakanyang nga padayon ang pagpangandam sa gobyerno alang sa pagbukas sa klase sa Agosto 24, 2020.
Gi-klaro sa kalihim nga ang “face-to-face classes” ang gipasabot sa Presidente nga dili una magbukas hangtod may bakuna na ug kun wala nay ipatuman nga community quarantine.
Apan giingong wala kini nagpasabot nga dili na ibalik ang klase sa mga tinun-an.
Matud pa ni Roque nga magpatuman ang DepEd og “blended learning,” diin gamiton ang computer, TV, ug community radio stations aron mapadayon ang pagtuon.
Samtang dala niini, ipadayon usab ang online learning sa mga pribadong tunghaan. (ecb/PIA7-Bohol)