By Rey Anthony H. Chiu, PIA
CORTES, (PIA) — Dungan sa pagdeklara sa state of public health emergency ug state of calamity, ang Home Development Mutual Fund (PAG-IBIG Fund) nagbukas na usab sa labing ubos nga interes nga Calamity Loan alang sa pag-abag sa mga sakop nga nahiagum sa kalisud.
Kini maoy gibutyag ni Bohol PAG-IBIG Fund Sales and Marketing head Leonardo Cirujales, didto sa labing bag-o nga Kapihan sa PIA nga nagtuki sa mga lakang abag sa kagamhanan sa mga naapektohan sa mga palisiya batok sa Coronavirus disease (COVID19).
Hinuon, ang pasilidad sa Calamity Loan, dili magbukas sa tibuok tuig, tulo ka buwan lamang sukad gideklara ang State of Calamity.
Samtang dunay deklarasyon sa kalamidad gikan sa Presidente ug dili gani gikan sa lokal nga Chief Executives o Sanggunian, adunay 90 ka adlaw dayon alang sa mga sakop nga maka-avail sa Calamity Loan, nga may labing ubos nga 5.96 percent, saysay ni Cirujales.
Mahimong kahuwaman ang 80 porsyento sa kinatibuk-ang natigum sa usa ka sakop, kana kon wala pa siyay laing huwam o utang sa Pag-ibig Funds, dugang niya.
Kini nagpasabut nga ang kwalipekado nga sakop makahuwam og 80% sa ilang kinatibuk-an nga Pag-IBIG Regular Savings, nga naglakip sa ilang binuwan nga hatagan lakip na usab ang bahin sa employer ug ang mga natigum nga dividends.
Kahinumduman nga gibugtaw ni Presidente Rodrigo Duterte ang State of Public Health Emergency tungod sa hulga sa pagkatag sa COVID-19 niadtong Marso 8, 2020.
Ug alang sa mga sakop nga apektado sa mga gipahimutang nga mga lakang subay sa pagpatunhay sa state of public health emergency, ang Pag-IBIG Fund Calamity Loan Program nagtumong sa paghatag og dinalian nga tabang pinansyal ngadto sa iyang mga sakop ilabi na niadtong nahimutang sa mga lugar nga naigo sa kalamidad sa kasanihan.
Hinuon, kadtong makahuwam kadto lamang mga sakop nga aktibong nagbutangan sa iyang pangpundo sa PAG-IBIG FUND ug nanimuyo sa lugar diin gideklara ang state of calamity.
Ikaduha, kinahanglan nga may labing menos 24 siya ka buwan nga binuwan nga kontribusyon isip monthly membership savings (MS) ug igo nga kamatuoran nga may igo siyang kita.
Ug kon ugaling ang sakop may kasamtangan pa nga Pag-IBIG Fund Housing Loan, MPL o Calamity Loan, kinahanglang nga updated ang bayad niini aron maka qualify.
Sa sakop nga may outstanding Multi-Purpose o Calamity Loan, ang kinatibuk-an nga bili sa mahuwam ug madawat mao ang mahibiling sa 80% sa imong kinatibuk-an nga natigum sa PAG-IBIG Fund, kuhaan sa nahibilin nga balayranan sa imong kasamtangan nga loans, matud ni Cirujales.
Ang PAG-IBIG Fund Calamity Loan bayaran sulod sa duha ka tuig ug magsugod ang tingil sa ika tulo ka buwan human makuha sa sakop ang loan.
Alang sa mga sakop nga formally-employed, ang bayranan sa ilang loans ipaagi sa kasabutan sa salary deduction tali sa employer.
Alang sa mga self-employed, Overseas Filipino Workers (OFWs), ug uban pang nagpasakop pinaagi sa pagka indibidwal nga paagi, mobayad sila sa bisan hain man nga Pag-IBIG Fund branches.
Hinuon, mipahimangno usab ang PAG-IBIG FUND, sa kasamtangan nga mga palisiya sa Community Quarantine, dala sa social distancing ug pagdili sa pagtapoktapok, 25 lamang ka tawo ang atubangon sa buhatan matag adlaw gikan sa alas 8:00 sa buntag ngadto sa alas 3:00 sa palis.
Paneguro og sayo ug ayaw palabya ang talagsaon nga kahigayunan alang niini, panapos ni Cirujales. (rahc/PIA-7/Bohol)