CORTES, (PIA)—Sugod Mayo 25 ngadto sa 27, kapin sa 24 mil ka Overseas Filipino Workers (OFWs) kinsa nakapasar na sa gikinahanglang Reverse Transcription Polymerase Chain Reaction (RT-PCR) nga gipahigayon sa Philippine Coast Guard (PCR) ug sa Bureau of Quarantine (BOQ) sa Inter Agency Task Force on the Management of Emerging Infectious Diseases (IATF-MEID).
Sa usa ka suwat pahibaw ni Department of the Interior and Local Government (DILG) Undersecretary Epimaco Densing III, gibutyag nga kapin sa 8,000 ka OFWs matag adlaw ang ipadala pauli ngadto sa ilang mga rehiyon nga pinuy-anan subay sa mga kasagaran nga panakyanan: eroplano, sakyanan sa yuta ug sakyanan sa dagat.
Ang suwat pahibaw gitumong ngadto sa mga Regional Directorsd, Gobernadores, City ug town mayors, Provincial directors ug hepe sa mga kapolisan, ug naghangyo sa pag-alayon alang sa walay sabud nga dinaghang pagpabyahe sa mga namauli nga OFWs ngadto na sa ilang tagsatagsa ka rehiyon sa nasud, pinitsahan Mayo 25.
Gani sa kadaghan, matud sa DILG, mahimo nga dili na nila ikapahibaw ang mga pangalan sa mga OFWs nga manguli, mao nga tambag sa DILG ngadto sa mga Lokal nga kagamhanan, dawata basta may ikapakita ang OFWs nga mga gikinahanglan nga mga dokumentos.
Gani, matud sa DILG, sa higayon nga ang OFW may dili kompleto nga mga dokumentos, o walay dokumentos nga gihuptan, ang mga LGUs na ang mopahiluna kanila sa quarantine facility, o ipatesting sa RT PCR ug ihiklin sa quarantine facility samtang nagpaabut pa sa resulta sa tests.
Segun sa DILG, kini ang gisugyot nga proseso: Ang OFW kuhaon gikan sa iyang gipuy-an nga hotel o Quarantine Facility, ug ubanan sa PCG o sa tinugyanan sa Overseas Workers Welfare Administration (OWWA) ug kon taga Luzon, pagadalhon ngadto sa Paranaque Integrated Terminal Exchange diin may mga sakyanan nga giandam na ang kagamhanan nga ilang luwanan pauli sa ilang mga lugar.
Sa mga taga Visayas ug Mindanao, ang mga OFWs pagadalhon sa Ninoy Aquino International Airport Terminal II, aron makasakay sa eroplano nga magdala kanila pauli sa ilang mga lalawigan ug syudad.
Pag-abut sa ilang mga lugar pinuy-anan, kinahanglang ipakita sa OFWs ang kopya sa ilang Quarantine Certificates gikan sa BOQ, o ilang mga pangalan nga nahilakip sa mga nakalabang sa negative RT PCR test alang sa COVID-19, nga naa sa masterlist sa PCG.
Kahinumduman nga ang IATF MEID pinaagi sa ilang sub cluster on Quarantines mihimo na sa pagpahibaw ngadto sa mga OFWs nga makit-an na ang resulta sa ilang mga RT PCR tests online sa PCG website ug facebook pages.
Niini, ang DILG maoy mangunay sa pagpahimutang sa coordinasyon ngadto sa mga natungdan nga LGUS, magpahimutang usab og one-stop-shop ang mga nahitungdan nga ahensya sa pagpapauli sa mga OFWs, didto sa mga airport, samtang nagpaabut pa sila sa ilang mga eroplano. (rahchiu/PIA-7/Bohol)