CORTES, PIA)—Gikompirmar sa mga tinugyanan sa Bohol Environment Management Office (BEMO) nga ang dyutay nga paglugak sa presyo sa isda sa Bohol, dala sa dili na ikahatud ang kinatibuk-an nga kuha sa kadagatan ngadto sa Sugbo, mao nga dinhi na itumod.
Didto sa Kapihan sa PIA aron handumon ang buwan sa Mayo isip Ocean Month, gibutyag ni Jose Garcia, representante sa BEMO, nga sa kinatibuk-an nga kita sa mga mangingisda ilabi na didto sa mga isdaan nga lugar sa Bohol, 80 porsyento sa ilang kuha, itumod didto sa Sugbo samtang 20 porsyento lamang ang mabaligya dinhi.
Gisaysay usab sa tinugyanan nga naa sa ubos sa Buhatan sa Gobernador sa Bohol nga daghan nga mangingisda ang adto motumod sa Sugbo tungod kay sayun ra nila ang pagkuha og kwarta ug pagpanghuwam didto.
Niini, dagway og mapugos na gani ang mga Bol-anong mangingisda sa paghatud sa ilang kuha sa Sugbo sa higayon nga maka una sila og kuha og kwarta dala sa dinali-an nga panginahanglan.
Apan sukad nagsugod ang gipatuman nga No Sail Policy dala sa pagpugong sa pagpanakod sa coronavirus disease (COVID-19), wala nay isda gikan sa Bohol ang makalusot sa mga kamerkadohan sa Sugbo, hinungdan nga dinhi na kini itumod.
Hinuon, segun sa mga tigpaniid, may dyutay man nga pagkunhod sa presyo sa isda, mahal pa gihapon alang sa mga Bol-anon.
Gani, gikan pa sa mga mananagat nga nasayud nga patungan ra gihapon sa mga mopaginansya ang ilang isda, presyohan na nila kini.
Kini bisan pa nga namatikdan na nga medyo daghan na ang isda nga makuha human ang dagat nakapahuway gikan sa walay puas nga panagat.
Ang nakapahuway nga kadagatan, pun-an pa sa dili na ikatabok ang kinatibuk-an nga kuha sa Sugbo, duha ka dagko nga basehan ngano nga wala pa gihapon magkasibo ang presyo sa isda sa Bohol.
Sa kasayuran sa BEMO, daghan na usab ang nagtuo nga ang realidad sa sayon nga pahuwam sa Sugbo, bisan pag mogasto og gasoline pagtabok, may kongkreto nga lakang na nga mahimo niini ang mga magbabalaod sa Sangguniang Panlalawigan ug ang Gobernador.
Sa mahal pa gihapon nga presyo sa isda, naglaum ang mga konsumidor nga kahimo-an na kini og dinali-ang lakang, kay samtang nagpadayon ang mga walay lisensya nga manglab-asay karga sa motor, ang suliran sa presyo sa isda sa Bohol, dili gayud mokanaug.
Kini bisan pa nga giatiman na og maayo ang mga tinubdan sa isda sama sa mga ‘protected areas’ nga maoy gitutokan sa kasaulogan sa Month of the Ocean karon. (rahchiu/PIA-7/Bohol)