Ni Rey Anthony H. Chiu, PIA
CORTES, Bohol, (PIA)—Hangtud alas 12 sa udto niadtong Hunyo 8, tulo na lamang ka lokal nga kagamhanan sa Bohol nga benepisaryo sa dinaliang ayuda sa Social Amelioration Program (SAP) ang nagbitay pa sa ilang SAP Liquidation.
Wala man hinganli sa Department of Social Welfare and Development (DSWD), nasayran nga ang mga kalungsuran sa Anda, Talibon ug syudad sa Tagbilaran ang nagpabilin nga naghipno pa sa ilang liquidation reports sa unang hugna sa SAP nga nadawat sa mga banay sa labing kabus ug ubos ang kita niadto pang buwan sa Mayo.
Niini, sa 48 ka lungsod ug syudad, 45 na lang ang ka kalungsuran ang nakakompleto na sa paghatag sa liquidation reports, diin nagbutang sa over-all 93.75% ang accomplishment rate sa Bohol.
Niini, iwit na ang Bohol sa kinatibuk-an nga Central Visayas, human ang Siquijor ug Negros Oriental nakakompleto na sa ilang liquidation niadtong mi-aging semana pa.
Naapsan na usab ang Bohol sa silingan nga lalawigan niini nga Sugbo nga may duha na lamang ka lungsod ang wala pa makahipno sa ilang SAP liquidation, segun pa sa DSWD 7 Regional Field Office.
Ang Sugbo nakaangkon na sa 96.23% accomplishment rate diin 51 sa 53 na nila ka kalungsuran ang makatibawas na sa ilang gikinahanglang rekisitos aron makasugod na sa proseso sa ika duha nga hugna sa pagpang-apud-apod sa SAP.
Matud sa DSWD, kinatibuk-ang 127 na sa 132 ka lokal nga mga kagamhanan sa tibuok Central Visayas ang nakalimpyo na sa ilang mga papeles sa pagpatin-aw nga nahatag na gayud ang ilang unang hugna nga SAP.
Kini, nagbutang sa DSWD 7 Regional Field Office sa 96.21% accomplishment rate, segun pa usab sa taho sa DSWD.
Sa imaging semana, nabiyaan sa Bohol ang Sugbo sa SAP liquidation reports diha nga may 4 pa ka lungsod sa Bohol ang nag-ungot ang ilang SAP liquidation apan 6 pa ka kalungsuran sa Sugbo ang wala pa makahuman sa ilang liquidation. (rahchiu/PIA-7/Bohol)