Ni Rey Anthony H. Chiu, PIA
TAGBILARAN CITY (PIA)—Kapin sa usa ka libo ka Bol-anong mag-uuma nga sakop sa nga Agrarian Reform Communities ang nakadawat sa Package of Supplementary food ug non food relief packages ang natunol sa Department of Agrarian Reform (DAR) Bohol Provincial Agrarian Reform Field Office (PARFO) ngadto sa mga kabus nga sakop sa lima ka cluster municipalities sa Agrarian Reform Beneficiaries (ARBs) dinhi sa Bohol dili pa lamang dugay.
Ang kasamtangan nga 1,305 ka mag-uuma, lakip sa 126,565 nga mag-uuma nga midawat sa pinutos nga relief goods nga ihatag sa DAR lukop sa tibuok nasud.
Matud pa ni Maria Lydia Bantugan, ang information officer sa DAR nga ang relief packages may sulod nga 4 ka kilo nga bugas, noodles, sardinas, bitamina ug mga sabon pangkaligo ug gipangtunol sa mga benepisaryo nga natumbok na sa listahan sa DAR Central Office sa Manila
Ang relief operations kabahin sa proyekto sa DAR nga gitawag og PaSSOver: ARBold for Deliverance of ARBs from Covid-19 pandemic, segun pa sa taho ni Bantugan.
Ang ARBOLD Move usa ka pamaagi nga gihimo sa DAR aron makatabang sila sa pagtubag sa hagit sa Bayanihan To Heal As One Act or Republic Act 11469.
Gitumong niini ang makahatag sa gikinahanglan nga suporta nga serbisyo sa mga ARBs aron kaaksyonan ang mga suliran ug panginahanglan nga napakgang sa panahon nga ang nasud nagsagubang sa pandemya sa COVID-19.
Segun pa sa DAR, ang ARBold Move may upat ka parte: una niini ang paghatag og suporta sa mga ARBO isip mga frontliners nga nagpuno sa kakuwangan sa pagkaon ug sa supply chain niini.
Dinhi ang DAR naghatag og mga quarantine accreditation passes sa mga mag-uuma aron makahatud sa ilang mga produkto ngSdto sa mga merkado nga dili na langayon pa sa mga checkpoints, ug dali nga makapaabut sa ilang mga produkto sa mga lugar nga nagpadayon ang hugot nga pagpugong sa pagbyahe ug paggawas sa balay.
Ang ARBOLD Move usab may Farm Productivity Assistance sa mga ARBs ug ARB Organizations sama sa paghatag sa mga binhi, abono, ug pamatay-dangan aron padayon silang makapananum, may maani ug makaon ug may kita usab nga ikalahutay samtang nia pa ang pandemya.
Ubos usab niini, ang DAR nangtahag og identification cards sa mga ARBs aron mas dali usab kanila ang makadawat sa mga programang hinabang sama sa SAP ug ubang ayuda sa kagamhanan.
Dinhi sa Bohol, segun pa ni PARFO Grace Fua, nakahatag na sila sa 1,550 ka mga ID cards subay usab sa listahan nga gipakanaug sa DAR Central Office.
Subay usab sa ARBold Move, ang DAR nagtanyag og Livelihood Support for Women in Crisis Situations diin gitumong sa ahensya nga makahatag og panginabuhian sa 1,200 ka mga kababayen-an nga naglisud sulod sa mga ARBs.
Dinhi masukip ang mga pangitlogan, pangmanokan, baboyan ug uban pang negosyo nga kapangitaan og kwarta, segun sa DAR.
Dinhi, unang tuyo nga abagan ang mga kababayen-an nga walay katimbang sa pagbuhi sa mga anak sama sa dalagang angkan, byuda, tiguwang ug kadtong may sakit, sama usab sa mga sakop sa mga tribo nga apektado usab sa ECQ.
Ang ika-upat na nga Supplementary Package or food and non-food relief nga ipang-apud-apod sa mga benepisaryo sa tibuok nasud. (rahchiu/PIA-7/Bohol uban ni MLDBantugan/DAR PIO)