Ni Rey Anthony H. Chiu, PIA
TAGBILARAN CITY (PIA)—Gidawat sa 30 ka mga nag-okupar sa mga stalls sa nasunog nga merkado sa Cogon ang P10 mil nga kantidad sa vouchers niadtong Mayo 29.
Ang pagtugyan gisaksihan usab ni City Mayor John Geesnell “Baba” Yap ug City Fire Marshall Senior Fire Inspector Marlyn R. Macatangay.
Kini nga vouchers isipon nga sinugdanan nga Negosyo Kits aron sila hinayhinay nga makabalik sa pagpatigayon human nasunogan.
Ang Negosyo Kit vouchers nga gitunol sa Department of Trade and Industry pinaagi sa DTI Bohol Provincial Office didto sa Atrium sa Tagbilaran City Hall, maoy labing una nga hugna sa tabang alang sa 98 ka mga nag-abang sa luna apan nawad-an og panginabuhian human nasunog ang ubang mga parte sa merkado.
Ang Negosyo Kits, maoy pamaagi sa DTI nga makatubag sa hagit sa nasudnong panawagan subay sa “Pangkabuhayan sa Pag Bangon at Ginhawa.”
Kini usa ka pamaagi diin ang DTI maghatag og mga kapanginabuhi-an pinaagi sa paghimong mga programa sa pagpaugmad sa ginagmay nga pamuhunan (microenterprises).
Matud sa DTI Bohol, kini nga inisyatiba buot lamang nga magsuporta sa mga komunidad ilabi na sa mga gagmay nga mamumuhunan nga apektado sa natural ug ‘human-induced’ nga katalagman, aron makabangon human sa pagkalup-og.
Kahinumduman nga niadtong Julyo 10, 2019, sa mga alas dos sa palis, usa ka sunog ang milamoy sa pipila ka stalls ug shops sulod sa merkado sa Cogon.
Kasagaran sa mga nangabang sa merkado, nagnegosyo sa wholesale ug retail, ug halos walay napunit nga kabtangan nga nahipos tungod sa kapaspas sa pagtilap sa kalayo.
Sa 98 ka mga tenants nga biktima sa sunog segun sa Tagbilaran City Government, silang tanan na ang mipailawom sa mga bansaybansay sa pagpamuhunan ug gihatagan usab sa orientation sa mga programa sa DTI pinaagi sa iyang Negosyo Centers.
Sa nagalan ni DTI Bohol Provincial Director Maria Soledad Balistoy, si Jerome John J. Gabin, Senior Trade and Industry Development Specialist ang mipahiluna sa pagtugyan sa hinabang. (rahchiu/PIA-7/Bohol)