Ni Rey Anthony H. Chiu, PIA

CORTES, Bohol, (PIA)—Sa puhunan nga P7.2 milyones gikan sa kagamhanan ang gilauman nga maghatag og dugangan ug kita sa mga mag-uuma sa Sierra Bullones kansang mga humayan malakip sa 50 ektaryas nga ma-alagaran sa diversion dam nga abrihan sa Barangay Abachanan, Sierra Bullones.

Kini maoy taho nga gisaysay ni Department of Agriculture 7 Regional Executive Director Atty. Salvador Diputado sa iyang facebook account.

Sa ‘groundbreaking ceremony’ niadtong Hunyo 4, 2020, gitaho usab ni Atty. Diputado nga ang mahinungdanon nga kalihukang opisyal linawas nga gitambongan mismo nila ni Sierra Bullones Mayor Simplicio “Dodie” Maestrado, ni 3rd district Representative Kristine Alexie Tutor, ug mga sakop sa ABADALU Irrigators Association, Inc. sa Abachanan, Sierra Bullones, Bohol, kinsa maoy magadumala ug magpadagan sa nahisgutan nga pasilidad human kini makompleto.

Dugang niya, may bintaha ang Abachanan tungod sa iyang elevated position, sa nahisgutan nga puhunan sa kagamhanan nga P7.2 milyones, makapatubig kini sa labing menos 50 ektaryas nga humayan.

Sa gipaambit ni Atty. Diputado, si Segundino Balaba, presidente sa kahugpungan sa mga mag-uuma sa iyang Letter of Intent nga giduso ngadto sa DA7 sa milabay nga tuig, milaum nga ang pagtukod sa diversion dam daku og ikatabang sa mga sakop nga mag-uuma nga nanghumayan didto.

Iyang gidason ang mahinungdanon nga tabang sa patubig nga makuha gilayon sa tukmang panahon ngadto sa ilang tagsatagsa ka luwang nga gitikad, magpadaghan sa ilang produksyon.

Sa iyang facebook account, gipalanug ni Diputado ang iyang pasalamat ngadto kang DA Secretary William Dar sa paggahin og pundo alang sa proyekto samtang mainiton niini nga gidawat ang hagit sa departamento sa uswag nga ani nga naa lamang sa 10% ang gipangayo sa kagamhanan.

Kini nga kalambuan giduyogan usab sa mga Barangay officials ug mga mag-uuma nga makabenepisyo sa bag-ong proyekto sa Abachanan samtang ilang gipaabut usab ang ilang pasalamat ngadto sa DA pinaagi ni Secretary Dar.

Ang Sierra Bullones usa sa labing dako nga nag-ani sa humay ug usa sa labing daku nga ‘rice producing towns’ sa lalawigan sa Bohol.