By Rey Anthony H. Chiu, PIA
Katlo-an ug duha (32) ka mga Siquijodnon nga nangatanggong dinhi sa Bohol sulod sa kapin sa tulo ka buwan ang organisado nga miluwan sa barko sa Philippine Coast Guard (PCG) sa ilang pagpamauli ngadto na sa ilang isla nga lalawigan.
Kahinumduman nga dala sa pagpanghulga sa corona virus disease (COVID) sa Pilipinas ilabi na sa mga rehiyon nga wala pa masudli sa kagaw nga mananankod, gisirad-an sa Bohol ang iyang mga utlanan aron pugngan ang pagtabok sa kagaw gikan sa mga silingan nga lalawigan nga aduna nay kaso nga nagpanakod-takod.
Pipila sa mga nalakip sa pagsira ang mga langyaw nga mga turista ang mga Pinoy nga nisuroy sa Bohol ug nakaamgo nga wala nay barko ug eroplano nga gitugotan nga molawig.
Sa kadaghan sa mga nangatanggong, ang Department of Tourism (DOT) kauban sa mga embahada sa mga nasud nga gigikanan sa mga turista, nagpahimo sa mga sweeper flights ug trips aron makuha ang ilang mga residente.
Sa sitwasyon sa mga taga Siquijor, nakigsabut ang DOT sa Philippine Coast Guard aron ikapasakay ang mga natanggong nga mga Siquijodnon pabalik ngadto sa ilang lalawigan.
Niini, gipahiluna ni PCG Bohol District Station Commander Lieutenant Junior Grade Tristan Jener Erediano uban ni Petty Officer First Class Vincent Paul Y, ang hepe sa Coast Guard Station sa Tagbilaran.
Niadtong Hunyo 17, sa may ala una sa palis, migikan sa pantalan sa Tagbilaran ang Multi Role Rescue Vessel (MRRV) 4404 sa PCG nga BRP Capones paingon na sa Siquijor luwan ang 32 ka Siquijodnon.
Ang 32 ka mga Siquijodnon nga giisip nga Locally Stranded Individuals (LSI) kompleto nga nanggibitbit sa Travel Authority human gikan sa kapolisan usab makakuha sa Medical Clearance Certificate nga nagmatuod nga wala silay mga simtomas ug wala sila masakit sa COVID sa katapusan nag 14 ka adlaw sa pala pa sila moluwan sa barko sa PCG, matud sa PCG Tagbilaran.
Segun pa sa mga tinubdan sa kagamhanan, samtang nagpadayon pa gihapon ang No Sail Policy sa mga kadagatan ug No Fly Policy sa kahanginan, may nga espesyal nga mga permits alang sa mga byahe nga nagpanghatud sa mga LSI ug mga OFWs pabalik sa ilang mga lugar nga gigikanan.
Matud ni BRP Capones Commanding Officer Captain Romeo Pulido Jr., dili lamang kay kini ang labing una nga byahe sa iyang barko nga gidala aron pagpanghatud sa mga LSI.
Ang BPR Capones nagkuha na usab sa mga taga Sugbo nga natanggong dinhi sa Bohol pipila ka semana ang milabay. (rahc/PIA-7/Bohol)