By Elvira Bongosia,PIA
Gi-uswag pa og 15 ka adlaw sa Social Security System (SSS) ang pagbayad og kontribusyon sa piniling mga miyembro niini.
Matud pa ni SSS president ug chief executive officer Aurora Ignacio sa gipagawas nga advisory, ang self-employed, voluntary ug non-working spouse members mahimo pang bayran ang ilang kontribusyon alang sa mga buwan sa Enero taman Marso hangtod sa Hunyo 30.
Alang sa mga regular employers, taman Hunyo 15, 2020 lamang nila bayran ang ilang employers’ contribution gikan Pebrero hangtod Mayo 2020.
Ang mga employers nga adunay approved installment proposals ubos sa Contribution Penalty Condonation Program, gitambagan sa pag-deposit sa ilang post-dated checks due sa samang buwan sa Hunyo 30, 2020.
Una nang nipahibalo ang SSS nga ilang gi-uswag ngadto sa Hunyo 15 ang pagbayad sa kontribusyon aron mahatagan og igong panahon ang ilang mga miyembro sa pagbayad tungod sa mga pagdili nga gipatuman tungod sa coronavirus disease (COVID) 19 pandemic.
Sa susamang advisory, gipahibalo ni Ignacio nga ang payment deadline alang sa applicable months human sa Abril 2020 mosunod sa regular payment schedule.
Alang sa dugang impormasyon kalabot sa nagkalain-laing SSS payment channels, gitambagan sa buhatan ilang mga miyembro ug employers sa pagbisita sa SSS Facebook page ug Philippine Social Security System FB page. (ecb/PIA7-Bohol)