By Rey Anthony H. Chiu, PIA
Inspeksyonon una sa mga tinugyanan sa Department of Trade and Industry (DTI) ug sa mga tinugyanan sa buhatan sa Mayor sa dili pa tugotan ang mga kan-anan ug mga restaurant nga moalagad sa pagkaon sa mga customer sulod sa establisemento niini.
Ang bahan nga mohimo sa pag-inspeksyon, magsuta kon ang establisemento sa kan-anan nakapahimutang ba sa mga lagda nga angayan buhaton aron luwas nga maka-pakaon sa mga customer nga dili mahadlok nga matakboyan sa sakit sama sa kagaw sa Coronavirus disease.
Kini maoy unod sa Section 2 sa Executive Order No. 31, series of 2020 nga nag-inat pa sa General Community Quarantine (GCQ) sa kinatibuk-an nga lalawigan sa Bohol ngadto na sa Hunyo 30, 2020.
Kahinumduman nga niadtong Mayo 29, giluwatan ni Gob Arthur Yap ang Executive Order No. 28, series of 2020 nga naglansang sa GCQ sa Bohol hangtud sa Hunyo 15, aron pugngan ang pagkatag sa COVID-19.
Apan sa nagkadaghan nga nagpositibo sa kaso sa sakit dinhi sa Bohol, nagkalapad usab ang posibilidad sa pagpanakod-takod, hinungdan sa gi-inat pa gihapon nga GCQ.
Sa sama nga deklarasyon, padayonon pa gihapon ang curfew sa kinatibuk-ang lalawigan aron ikapatuman ang home quarantine, partial nga pagpugong sa pag-inum-inum ug pagpakigtagay, pugos nga paggamit sa face masks, giregulate nga pagpadagan sa mga establisemento, pagpadayon sa one-hpusehold-one pass policy ug sa padayon nga pagbukas sa mga negosyo nga natumbok nga buksan ilawom sa bag-ong normal nga mga patakaran.
Subay sa bag-ong Executive Order, tugotan na ang pagpakaon sulod mismo sa mga kan-anan, uyon usab sa sugyot sa DTI, apan sa ikatulong bahin lamang sa kinatibuk-an nga kapasidad sa kan-anan.
Dinhi, gikinahanglan nga adunay pagahimoon nga pag-usab sa lay-out sa kan-anan aron maseguro nga ang mga lingkoranan sa mga customer anaa sa gilatid nga gilay-on.
Kauban sa mga gisugyot sa DTI kabahin sa pagbukas sa mga kan-anan ang mosunod: dili makasulod ang walay facemask, pagbutang og footbacth nga may pamatay kagaw sa pultahan, paggamit sa thermal scanner, paggamit sa alcohol aron ikapanghunaw sa customer, pagpatuman ang social distancing protocols, regular nga 10 minutos nga lugway aron makapang dis-infect ang kan-anan human ipagamit na usab ang lamesa.
Kinahanglan usab nga bukas pa gihapon ang order system, may sundon nga pamaagi sa pagpakig-estorya sa kustomer, mga kasabutan unsay buhaton sa customer nga dili mosubay sa protocol, ug ang pagbaton sa mga listahan sa mga guests ug ilang contact numbers alang sa mas sayon nga contact tracing. (rahc/PIA-7/Bohol)