Ni Elvira Bongosia, PIA
Ang CSC nihatag og dugang 60 ka adlaw nga palugit alang sa pagduso sa SALN sa mga empleyado ug opisyal sa gobyerno gikan sa Hunyo 30 nga mao unta ang katapusang adlaw sa pagduso niini. (ecb/PIA7-Bohol)
TAGBILARAN CITY, June 24 (PIA) — Mihatag og dugang 60 ka adlaw nga palugit ang Civil Service Commission alang sa pagduso sa Statement of Assets, Liabilities and Net Worth (SALN) Form sa mga empleyado ug opisyal sa gobyerno.
Sa gipagawas nga CSC Resolution No. 2000603 nga gi-petsahan og Hunyo 22, 2020, gihatagan sa komisyon ang tanang empleyado ug opisyal sa gobyerno og dugang 60 ka adlaw gikan sa Hunyo 30 nga mao unta ang katapusang adlaw sa pagduso sa SALN.
Kini nagpasabot nga imbes karong Hunyo 30 ang deadline, mamahimong sa Agosto 31 na ang katapusang adlaw alang sa filing sa SALN sa ilang mga departamento o ahensya.
Tanang heads of department, office o agency gimanduan sa pagmugna og procedures alang sa pag-review sa SALN aron masiguro nga maduso kini sa saktong panahon, , kumpleto ug sakto ang form.
Ang katapusang adlaw usab sa submission sa SALN Forms sa mga departamento ug ahensiya sa gobyerno, gi-uswag usab hangtod sa Oktubre 31, 2020.
Ang SALN usa ka deklarasyon sa assets o mga kabtangan (yuta, sakyanan ug uban pa) ug mga utang (loans, mga gibayarang interes ug uban pa) sa usa ka empleyado o ospital sa gobyerno, apil na sa ilang asawa, ug mga anak nga wala pa nakasal ug menor de edad nga nagpuyo pa gihapon kauban sa mga ginikanan.
Pugos ang pagduso sa SALN ubos sa Artikulo XI, Seksiyon 17 sa 1987 Konstitusyon, ug Seksiyon 8 sa Republic Act No. 6713, ang “Code of Conduct and Ethical Standards for Public Officials and Employees.”
Kauban niini ang usa ka waiver nga naghatag og gahom sa Ombudsman o sa iyang awtorisadong representante nga makuha ang mga dokumentong mahimong magpakita sa mga gipanag-iya, liabilidad, kinatibuk-ang katigayonan, interes sa negosyo, ug mga koneksiyong pampinansiya sa tanang hingtungdang ahensiya sa gobyerno. (ecb/PIA7-Bohol)