By Rey Anthony H. Chiu, PIA
Duha sa 14 ka gikataho nga mga pantalan nga nahuman sa Department of Transportation (DOTr) ug sa Philippine Ports Authority (PPA) taliwala sa pagpakigbugno sa kagamhanan sa Corona Virus Disease (COVID-19) pandemic, mga pantalan sa Bohol.
Ang pagkahuman sa mga proyekto, matud pa sa DOTr, magdugang sa katakus ug kapasidad sa mga pantalan samtang ang nasud nangandam na sa pagpahibalik sa inter-island nga mga byahe sa mga pangpasaherohan nga mga barko, ug ang pagtumod sa mga labing gikinahanglan nga mga gamit ug pagkaon samtang ang nasud padayon pang nakig-sagubang sa kagaw nga mananakod ug makamatay.
Sa taho, matud pa ni PPA General Manager Jay Daniel R. Santiago, nga samtang ang mga nakompleto nga mga proyekto, wala makalikay sa pagkalangay dala sa pagpahimutang sa mga community quarantines sa tibuok nasud, nalipay siya nga ang mga kontraktor nagpadayon pa gihapon sa pagtibawas sa mga proyekto nga na skedyul sulod pa gihapon sa panahon nga gitagal.
Gani, dugang niya, importante nga hibaw-an sa tanan nga ang mga natumbok nga mga proyekto, wala gyuy gikataho nga may natakdan sa COVID-19 sa mga trabahante, segun sa mga kontraktor, kini kay ila dayun nga napatuman ang gikinahanglan nga mga lakang pagpanalipod batok sa COVID-19.
Apil sa mga nakompleto nga mga pantalan ang Pantalan sa Jagna ug Pantalan sa Tagbilaran, tanan sa Bohol, natapos isip kabahin sa Build, Build Build program sa Kagamhanan.
Gawas sa Bohol nga may duha dayun ka pantalan nga napatuman, ang Palawan usab giswerte kay nahuman na usab ang Pantalan sa Borac sa Coron ug ang Pantalan sa San Fernando sa El Nido sa Palawan.
Apil sa 14 usab nga nakompleto nga pantalan mao ang Pantalan sa Cawit sa Boac, Marinduque, Pantalan sa Estancia sa Ilo-ilo, ang Pantalan sa Iligan City sa Lanao del Norte ug Pantalan sa Mansalay sa Oriental Mindoro.
Nahuman na usab ang Pantalan sa Ozamiz sa Misamis Occidental, Pantalan sa Malalag sa Davao del Sur, Pantalan sa Currimao sa Ilocos Sur, Pantalan sa Masao sa Agusan del Norte ug ang duha ka managlahi nga proyekto sa Iloilo Commercial Port Complex.
Gawas sa 22 nga mga nakompleto nga mga proyekto, lain nga 22 pa ka dugang mga proyekto ang gitagana nga humanon sulod ning tuig ug agi og suporta sa inisyatiba niining kasamtangan nga Administrasyon alang sa Build, Build, Build.
Alang sa 22 ka dugang mga proyekto, gipasalig usab sa DOTr nga ilang padayonon ang bansay sa new normal sa pagtibawas sa mga nahibilin nga mga proyekto nga naa na sa pipeline aron makaapas sa mga panginahanglan sa lokal ug sa pang-international nga standards sa patigayon ug turismo alang sa umaabut.
Niining tanan, kinahanglan usab nga ang atong mga trabahante, luwas sa sakit nga mananakod bisan pa nga wala pa matapos ang pagpakigsangka sa nasud sa COVID-19, saysay ni Santiago.
Iyang gipasabut nga sa makuti nga pagtutok sa DOTr, kining mga nahisgutan nga proyekto, kon mahuman na, maghimo sa atong pagdumala sa mga pantalan nga katumbas na sa international ug global standards.
Ang mga 22 ka proyekto nga gitarget nga matapos sa katapusang kwarter sa 2020 naglakip sa Pagpahiuli ug pag-upgrade sa Pier 18 sa Vitas, Tondo, Manila; ang pagpabarug sa Port Operations Building sa Abra de Ilog sa Occidental Mindoro; ang Balanacan Port Expansion Project sa Marinduque ug ang pagtukod sa Reinforced concrete Pier ug Ro-Ro ramp sa Pantalan sa Bansud sa Oriental Mindoro.
Ang pagtukod sa back-up area sa Pantalan sa Bulalacao sa Oriental Mindoro, pagtukod sa Ro-Ro ramp ug proyekto sa pagpalapad sa Pantalan sa Bulan sa Sorsogon; ang pagtukod sa Coastal Access Road project sa Pantalan sa Calapan Mindoro, ang pagpalapad sa pantalan sa Capinpin ug ang reconstruction sa Pantalan sa Carmen, San Agustin, Romblon.
Tapuson na usab ang Pantalan sa Cobo, Catanduanes; ang paghimo sa Port Operations Buildings sa mga pantalan sa Coron, Currimao, Masbate, Mauban sa Quezon, ug sa Talaga sa Mabini, Batangas.
Gilantaw usab nga humanon ang pagpahiuli ug pag-upgrade sa Reinforced Concrete wharf sa Pantalan sa Legazpi; ang mga pagpalapad sa mga Pantalan sa Matnog, Puerto Princesa sa Palawan, Salomague sa Ilocos Sur, Tablas sa Romblon, ug sa TMO Pasig; lakip na ang pagpahiuli sa Pantalan sa Tabaco sa Albay. (rahc/PIA-7/Bohol)