Minglagda ang mga sakop sa Municipal ug City Peace and Order Councils (MPOC, CPOC) sa Manifesto sa pagsuporta sa Anti-Terrorism Act of 2020, matud pa sa Kampo Dagohoy.
Sa iyang taho ngadto sa Provincial Peace and Order Council (PPOC) nga nagatutok usab sa mandato ni Presidente Rodrigo Duterte nga taposon na ang lokal nga mga pag-alsa batok sa kagamhanan sa mga komunistang terorista (End Local Communist Armed Conflict-ELCAC), si Police Senior Superintendent Joselito Clarito mibutyag nga lukop na sa Bohol ang suporta sa Anti-Terrorism Act.
Ang Anti-Terrorism Act of 2020 naga-usab sa Human Security Act of 2007, samtang nagpalapad usab sa buot ipasabut sa terorismo ug magpa-apil na niini ang mga buhat nga molahus na sa “kamatayon o grabe nga pagka-angol sa ni bisan kinsa,” ang “grabe nga kadaut ug pagkaguba sa bisan hain man nga pasilidad sa kagamhanan sa tumong nga pakurogon sa kahadlok ang publiko, o lumpagon ang legal nga kagamhanang politikal, economic ug social nga mga estraktura sa nasud.
Dinhi, kadtong mapamatud-an nga sad-an batok niini, mag-atubang sa pagkabilanggo sa tibuok kinabuhi ug walay posibilidad sa parole.
Ang balaodnon nga gitumbok sa Presidente nga urgent, gipasa na sa Ubos Balay Balaoranan human ang bersyon sa Senado napasa na niadtong Pebrero.
Subay sa Anti Terrorism Act, ang mga buhat sa “pagpanghulga, pagplano, pagbansay-bansay, pagpahiluna aron matigayun ang buhat terorismo, “pagsugyot ug pagsugnod aron mahinabo ang kagubot pinaagi sa mga pagpakigpulong, pagpadayag pinaagi sa pangsuwat, pagpabansiwag sa mga bandila ug mga simbolo nga mag-tukmod sa katawhan nga maghimo og tenerorismong kalihukan, makapahimo sa usaka tawo nga terorista.
Ang Municipal Peace and Order Councils (MPOC), hugot nga mingpaluyo sa gipanday nga balaodnon nga Anti-Terrorism Act of 2020 aron matubag na ug masumpo ang dugay na nga pag-alsa ug pagkatag sa kagubot sa mga terorista.
Kini, matud pa sa mga mingsuporta niini, naghatag og dako nga suliran diin ang katungod sa katawhan nasalikway na ug nasakripisyo sa tumong nga ang katuyuang terorismo mao’y mipatigbabaw.
Sa mga tigsuporta, ang balaodnon nagtumong nga makab-ot na sa matag Pilipino ang gihandum nga kalinaw sa katilingban.
Sayod ang tanan nga ang hulga sa terorismo mahimong makapatay sa ekonomiya sama sa pagka-wala sa mga turista, mga mamumuhunan ug uban pa.
Kong atong ginhandum ang usa ka nasud nga maugmaron, kini na ang higayon aron makabaton og epektibo nga pangkontra sa kriminalidad, terorismo, drugas ug pangurakot, segun sa mga mingsuporta.
Daghan na nga mga kabahin sa kasaysayan sa nasud nga nasinati-an nga ang nahisgutang nga babag sa kaugmaran nagkutlo pa ngani sa kinabuhi sa kabataan ug kababayen-an, matud pa.
Tungod niini, kami nagpadayag sa among kinasingkasing nga pagsuporta sa nasampit nga balaodnon ug isip sakop sa kagamhanan, among aghaton ang matag usa namo ka sakop nga gakson ug paluyohan ang balaod, sanglit kini alang sa kinatibuk-ang Pilipinas ug sa iyang mga umaabut nga henerasyon, saysay sa Manifesto nga gilagdaan sa mga sakop sa MPOC ug CPOC, lakip na ang nga sector nga apil niini. (rahchiu/PIA-7/Bohol)
HUGPANAN SA KALINAW. May panultihon nga ang kalinaw mahimong idlas ngadto sa mga tawo nga dili mangahas sa pag-amoma niini. Dinhi, gilagdaan ni Gob. Arthur Yap sa Bohol ang kasabutan tali sa Philippine Army sa pagtukod og tunghaan sa mga sundalo nga magbantay sa kahapsay ug kalinaw sa nasud, kurso nga maggahum sa mga sundalo sa mga teyorya sa pagpakig gira alang sa matunhayon nga kalinaw. (rahchiu/PIA-7/Bohol files)