Aminado ang mga tinugyanan sa Kampo Dagohoy nga ang dugang mga kadaugan sa Bohol batok sa kriminalidad, dala sa epekto sa pagpahimutang sa curfew, mga checkpoints ug mga control points sa pagpatuman sa mga lakang pagpugong sa pagkatap sa coronavirus disease dinhi sa Bohol.
Mismo si Police Senior Superintendent Joselito Clarito, kinsa bag-o lamang minghulip sa lugar isip hepe sa mga kapolisan sa Bohol, si SPO4 Francis Briones ug si SPO2 Liezl Diola, kinsa maoy representante sa Police Community Relations Branch sa Kampo Dagohoy didto sa Kapihan sa PIA, ang miangkon nga ang presensya sa kapolisan sa kadalanan dakong lakang pagsumpo sa mga ilegal nga kalihukan.
Gani, sa ‘comparative monthly trends of total crimes’ nga gipakita ni Police Colonel Clarito didto sa hiniusang virtual nga tigum sa Provincial Peace and Order Council, Provincial Anti-Drug Abuse Council ug sa ELCAC Committee niadtong miaging semana, nabutyag didto nga ang krimen sa Enero, mingsapong sa 894, ming-ubos sa Pebrero ngadto sa 850 ug mitiurok ngadto sa 716 sa Marso, ilabi na dihang gipahimutang na ang mga checkpoints.
Sa buwan sa Abril, diin naghugot na ang pagpatuman sa kwarantina, curfew ug paghuboghubog sa publiko, mingtibugsok pa og dugang ang krimen ngadto sa 501.
Sa panahon sa pista sa Mayo, gihikaw man ang pagpamista, ang buwan sa tingbibo, mingtapos nga natala sa Bohol ang 622 ka mga kaso.
Apan human sa pista ug sa pagka Hunyo, balik na usab sa ubos ang kaso nga naan a karon sa 429, taho ni Colonel Clarito sa PPOC.
Kinatibuk-an nga 908 ka kaso sa krimen ang gipakunhod sa listahan sa mga salaud nga natala sa Bohol sa buwan sa Abril ngadto sa Hunyo, kon itandi sa unang tulo ka buwan sa tuig 2020, kini nga gitaho sa Kampo Dagohoy didto sa Provincial Peace and Order Council virtual meeting niadtong Biyernes sa palis sa miaging semana.
Didto sa PPOC, si Police Senior Superintendent Joselito Clarito mibutyag nga ang pagkunhod sa mga kinatibuk-an nga kaso sa krimen miabut sa 36.91 porsyento.
Sa mga kaso o insidente nga naghulga sa kahusay ug kalinaw, o sa mga kaso nga giila nga pagsupak sa Revised Penal Code, gikan sa 1,568 ka kaso sa Enero ngadto sa Marso 2020, mingtibugsok kini ngadto na sa 1,227, o kinatibuk-an nga 341 ka kaso ang napugngan.
Kini, segun pa usab ni Police Executive Master Sergeant Francis Briones, 21.75 % nga pagkubos.
Didto sa Kapihan sa PIA niadtong Huwebes, Julyo 2, gibutyag usab ni SPO4 Briones, kinsa maoy gipadala sa Police Community Affairs and Development section sa Kampo Dagohoy alang sa radio forum.
Kon giisip nga daku na ang gi-us-os sa kaso sa mga krimen sa mga salaod nga naghulga sa peace and order, mas dagko og hagsak ang krimen nga naghulga sa public safety, dugang pa ni SPO4 Briones.
Sa iyang pagpasabut, matud niya gikan sa 567 ka kaso niadtong Enero ngadto sa Marso, napakanaug kini ngadto sa 325 na lamang sa dihang miabut ang Abril ngadto sa Hunyo.
Mikabat sa 63. 57 % ang mga kaso nga nakunhod sa katapusang tulo ka buwan nga gikwenta. (rahchiu/PIA-7/Bohol)