Ang Tawag 

EBANGHELYO (Mt 13:1-9) short form

¹Nianang adlawa mibiya si Jesus sa balay ug miadto sa daplin sa lanaw, ug milingkod siya didto aron pagtudlo. ²Daghan kaayo ang mga tawo nga mialirong kaniya, ug tungod niini misakay siya sa usa ka sakayan ug milingkod samtang ang mga tawo didto nagbarog sa lapyahan. ³Migamit siyag mga sambingay aron pagtudlo kanilag daghang mga butang. Miingon siya, “May usa ka tawo nga miadto sa uma aron pagpugas. ⁴Sa pagsabod niya sa binhi, pipila niini didto mahulog sa agianan, ug miabot ang mga langgam ug nanuka niini. ⁵Ang uban nahulog sa yuta nga batoon ug nanurok dayon kay dili man lalom ang yuta niini. ⁶Apan pagsubang na sa adlaw, nalawos ang mga linghod nga tanom, ug kay wala man makagamot pag-ayo, nangalaya dayon kini. ⁷Ang ubang mga binhi didto mahulog sa dapit sa mga sampinit, nanubo ang mga sampinit ug milumos sa mga tanom. ⁸Apan ang uban nahulog sa maayong yuta ug nanguhay: may nanguhay og taggatos, ang uban tagkan-uman, ug ang uban tagkatloan.” ⁹Ug miingon si Jesus, “Busa pamati kamo kon kamo dunay dalunggan!” Ang Ebanghelyo sa Ginoo.

oOo

KAHULOGAN SA EBANGHELYO (Mateo 13:1-9)

¹ Nianang adlawa mibiya si Jesus sa balay ug miadto sa daplin sa lanaw, ug milingkod siya didto aron pagtudlo.

Ang pulong “sambingay” nga sa Hebreo “mashal” nagkahulogan og “pagsaysay pinaagi sa mga paggamit og mga kasagarang panghitabo nga makatabang sa mga nakadungog sa pagkakaplag og kamatuoran.” Anaa gilibotan kita niining maong mga panghitabo. Pinaagi sa pagamit niining maong panghitabo si Jesus mipatataw sa mga balaanong kamatuoran. Mao kini ang nahitabo sa sambingay nga atong mabasa karon.

²Daghan kaayo ang mga tawo nga mialirong kaniya, ug tungod niini misakay siya sa usa ka sakayan ug milingkod samtang ang mga tawo didto nagbarog sa lapyahan. ^3aMigamit siyag mga sambingay aron pagtudlo kanilag daghang mga butang.

Sa kasaysayan sa atong Kristohanong Pagtuo dihay mga panahon nga kadaghanan sa mga nakadungog sa gitudlo sa Simbahan misunod gayod niini. Apan lahi na sa atong panahon karon kay nahitabo nga ang gitudlo sa Simbahan nahidangat sa unsay gihulagway ni Jesus sa iyang sambingay mahitungod sa pagpugas.

Si Jesus mipatataw kabahin sa duha ka matang sa mga nakadungog: kadtong mitan-aw, naminaw ug misabot; ug kadtong wala motan-aw ug wala sa tinuoray naminaw busa wala makasabot.

Pinaagi sa sambingay nahimong masayon nga sabton ang mga pagtulun-an nga gitudlo ni Cristo. Tungod kay aduna may kalambigitang mga misteryo sa mga gitudlo ni Jesus mao nga iyang gigamit ang mga sambingay aron mahimong sayon ang pagsabot niini.

Nagpabilin ang tawo nga gihatagan sa Dios sa kagawasan sa pagpaminaw ug pagsabot sa mga kamatuoran nga iyang gipadayag ngari kanato. Dili siya mopugos kang bisan kinsa sa paghatag og pagsabot niini. Ang gikinahanglan sa matag usa kanato mao lamang ang pagbukas sa atong tagsatagsa kanato sa iyang mga gipadayag.

Pinaagi sa sambingay ang Dios naghatag kanato og kahigayonan sa pagpanagita sa kamatuoran ug sa pagsabot sa kahulogan niini.

^3b“May usa ka tawo nga miadto sa uma aron pagpugas. ⁴Sa pagsabod niya sa binhi, pipila niini didto mahulog sa agianan, ug miabot ang mga langgam ug nanuka niini. ⁵Ang uban nahulog sa yuta nga batoon ug nanurok dayon kay dili man lalom ang yuta niini. ⁶Apan pagsubang na sa adlaw, nalawos ang mga linghod nga tanom, ug kay wala man makagamot pag-ayo, nangalaya dayon kini. ⁷Ang ubang mga binhi didto mahulog sa dapit sa mga sampinit, nanubo ang mga sampinit ug milumos sa mga tanom.

Pagkaluoy sa mga binhi! Pagkaluoy usab sa nagpugas! Kutob niining higayona ang paningkamot sa magpupugas walay kapuslanan. Ngano kaha nga si Jesus misaysay man niining kaagi nga naghulagway sa kapakyasan?

Kana tungod kay kita, ang matag usa kanato, nakasulay og daghang mga kapakyasan sa atong kinabuhi. Gikan sa sinugdanan sa atong pagpaningkamot hilabihan sa kadaghan pa ang atong maagihang mga kalisod una pa makatagbo sa gipaabot nga kadaugan.

Si Jesus mitan-aw sa atong mga kapakyasan. Sa panahon nga iyang gisaysay kining maong sambingay, tingali baya nga iya usab nga nakita sa unahan ang iyang kaugalingong kapakyasan sa iyang pagwali. Inay nga si Jesus maluya gumikan sa iyang mapaabot nga kapakyasan, iya hinoon nga gianinaw kini sa malawom nga pagpasabot.

⁸Apan ang uban nahulog sa maayong yuta ug nanguhay: may nanguhay og taggatos, ang uban tagkan-uman, ug ang uban tagkatloan.” ⁹Ug miingon si Jesus, “Busa pamati kamo kon kamo dunay dalunggan!”

Si Jesus mitug-an kanato og hilabihang kabililhon nga pagtulun-an kabahin sa birtud sa paglaum. Kon tan-awon nato ang kadaghan sa mga suliran, kon susihon nato ang dili ikag-asoy nga kakulang sa atong kinabuhi, kon tan-awon nato ang kaaw-ang sa kahulogan sa kinabuhi, dili gayod unta kini mohunong ug magpalumos sa mga maot nga panghunahuna ug pagbati. Kay bisan pa sa sinugdanang mga kapakyasan, anaay nagtago nga sa kaulahiang panahon atong maani. Pamati-on ta si Jesus!

Bisan pa diay kon dyutay ra kita sa atong panagtigum sa GSK Cluster, anaa pa ang paglaum!

Ang pag-inambitay ug ang pagpaminaway sa usag-usa panahon sa tigum sa GSK Cluster maoy usa ka paningkamot kanatong mga sakop niini nga ang Ebanghelyo nga gipanagsaloan mahitisok gayod sa maayong yuta.

Bisan pa sa mga nangaging higayon nga atong nadungog ang Ebanghelyo apan wala pa nato masabot; o kaha atong nasabot apan wala kita makalahutay sa pagpuyo sumala sa unsay gitudlo niini diha sa atong adlaw-adlaw nga pagbuhat; o atong nadawat apan nalumsan ra sa atong mga tawhanong kabalaka ug gugma sa mga kalibutanong bahandi, ang Ebanghelyo mahimo diay usab nga atong ipatighulog o itanom sa maayong yuta sa atong tanlag ug kasingkasing. Mamunga kini sila!