By Elvira Bongosia, PIA
Ilusad sa Government Service Insurance System (GSIS) ang computer loan program sa umaabot nga buwan sa Agosto.
Kini alang sa tinguhang makadungan sa new normal o blended learning sa Department of Education (DepEd) alang sa nagkaduol nga school year 2020-2021 ang mga estudyante.
Atol sa gipahigayong Pre-SONA forum, gibutyag ni Department of Finance (DOF) Kalihim Carlos Dominguez nga P30,000 loan program ang tanyag sa GSIS alang sa mga magtutudlo ug ginikanan aron makapalit og computer o laptop nga maoy gamiton usab sa ilang mga anak sa online learning.
Matud pa ni Dominguez, mahimong bayran ang maong loan sulod sa tulo ka tuig nga may 6 porsiyentong interest.
Samtang sa Setyembre usab ilusad sa GSIS ang education loan program diin ang mga kwalipikadong miyembro mahimong makahulam og hangtod P100,000sa matag academic school year alang sa ilang nominated student-beneficiaries.
Sigun pa sa kalihim nga mahimo kining bayaran sulod sa lima ka tuig. (ecb/PIA7-Bohol)