By Elvira Bongosia, PIA
TAGBILARAN CITY, (PIA) — Gibuksan sa Bohol Police Provincial Office (BPPO) ang ilang Malasakit and Makatao Recovery Center (MMRC) nga nahimutang sa Barangay Poblacion 2, ning syudad sa Tagbilaran niadtong Lunes, Hulyo 6, 2020.
Ang maong quarantine facility sa BPPO maoy butangan sa mga PNP personnel nga ipaubos sa self-isolation samtang e-monitor sa posibleng coronavirus disease 2019 (COVID-19) infection.
Ang covered court sa Barangay Poblacion 2 maoy gihimong quarantine facility.
Gibutyag ni BPPO Acting Provincial Director, Police Col. Joselito Clarito nga ang MMRC adunay 32 beds alang sa mga e-quarantine nga hatagan usab og libreng pagkaon, libreng renta ug uban pang serbisyo.
Matud pa nga kining inisyatiba, parte gihapon sa Biosafety Plan sa ilang organisasyon aron pagtabang sa ilang mga personnel nga magbaton og usa ka lugar nga dili na mabalaka kalabot sa bayad sa abangan ug ilang pagkaon samtang mopaubos sa quarantine.
Gidugang pa ni Clarito nga ang Police Regional Office ang nagmando sa ilang mga police provincial offices nga magbaton og kaugalingon nilang quarantine ug isolation center alang sa mga police personnel.
Ang pondo sa maong pasilidad naggikan sa nagkalain-laing local government units (LGUs) ug non-government organizations (NGOs).
Ang pagbukas sa maong quarantine facility natunong usab sa kick-off celebration sa Police Community Relation (PCR) Month nga selebrasyon sa BPPO nga anaa na karon sa ilang ika-25 ka tuig. (ecb/PIA7-Bohol)