By Rey Anthony H. Chiu, PIA
TAGBILARAN CITY, (PIA) –- Mahimo na nga modawat sa 50% nga kapasidad nga serbisyohan ang mga barberohan ug salon, kini subay sa gitugot sa Department of Trade and Industry (DTI) ilabi na sa mga lugar nga gipa-ubos na sa Modified General Community Quarantine.
Kahinumduman nga niadtong Hulyo 7, ang DTI mipagawas sa Memorandum Circular No. 28-38 o ang Updated Guidelines for Barbershops and Salons sa mga lugar nga naa sa General Community Quarantine (GCQ) ug sa Modified General Community Quarantine (MGCQ).
Ang nasampit nga Updated Guidelines alang sa mga tupihanan ug mga salon sa serbisyong pangpagwapa, nagatugot na sa pagpangtupi ug pangtina sa buhok, pagpang manicure ug pedicure, batakang serbisyo sama sa make-up, eyebrow threading, pasumpay sa kilay, pamasahe sa nawong ug uban pang personal nga serbisyo sama sa waxing, threading, shaving, foot spa, ug hand spa sa mga lugar nga naa sa MGCQ.
Hinuon, kining tanan mahimo lamang kon ang barberohan ug salon nga nahisgutan, estrikto nga magasubay sa protocols sa pagpanghunaw, pagsul-ob og face mask ug face shields, gwantis ug mga giilang mga gamit, kanunay gyud ipaagi sa pagpamatay kagaw.
Sa mga lugar nga ubos pa sa General Community Quarantine, ang mag barberohan ug mga salon makadawat lamang sa 30% nga kapasidad.
Gani, segun pa sa nahisgutan nga Memorandum, sugod sa Hulyo 16, may tugotan na nga mga barberohan ug salon nga magbukas sa 75% nga kapasidad kon sila naa sa lugar nga naa sa MGCQ, basta lamang ang ilang lugar magseguro nga ilang ikapatuman ang tamdanan sa physical ug social distancing.
Gawas pa niana, kinahanglan nga ang mga nahisgutan nga mga establisemento nagasunod gayud sa minimum nga sumbanan alang sa health protocols subay sa gilagda sa MC.
Tungod niini, maghimo og inspeksyon ang local nga DTI pinangulohan ni Provincial Director Maria Soledad Balistoy ngadto sa mga tupihanan ug salon aron tan-awan kon mahimo na ba nga kini sila magbukas na alang sa 75% nga kapasidad.
Kini gibutyag ni Balistoy atul sa ika upat nga Bohol Inter Agency Task Force in the Management of Emerging Infectious Disease strategic communications cluster niadtong Miyerkoles. (rahc/PIA-7/Bohol)