By Rey Anthony H. Chiu,PIA
TAGBILARAN CITY, (PIA) –- Milaum si Gobernador Arthur Yap nga mamaayo pa ang kahimtang sa tinubdan sa pagkaon sa Bohol kon ikapadayon sa kagamhanan ang pagtanyag og suporta ngadto sa mga residente nga karon naaghat na sa pagpananum.
Didto sa labing bag-o nga online nga tigum sa Strategic Committee Cluster sa Bohol Inter Agency Task Force on the Management of Infectious Disease Myerkoles, Hulyo 8, gitaho sa Agricultural Training Institute Regional Training Center sa Department of Agriculture nga may 19 na sila ka Agricultural Learning Sites nga nahatagan sa accreditation, ug mamahimo nga lugar diin makat-on ang mga buot masayud sa mga detalye ug teknolohiya sa mga nagkadaiyang klase sa panguma.
Matud ni ATI-7 Regional director ug Training Center Superintendent Dr. Carolyn Mae Daquio, ang 19 ka dapit nga nagkatag sa tulo ka distrito sa Bohol gitugotan na sa kagamhanan nga mamahimong lugar diin ang buot makat-on sa pagpanguma, makatuon didto.
Ang accreditation nga gihatag sa ATI niining mga Learning Centers, epektibo hangtud sa sunod nga tulo ka tuig human sa pagdawat niini, butyag ni Dr. Daquio.
Siyam sa mga accredited Farming Learning Centers naa sa Unang Distrito, upat sa Ikaduhang Distrito ug lain nga unom sa ikatulo nga Distrito sa Bohol.
Sa unang Distrito, ang mga Agricultural Learning Centers nga accredited sa ATI-7 mao ang lima ka Agri Learning Center alang sa Integrated Diversified Farming (IDF) nga nakabase sa mga tunghaan sa Manga National High School, San Isidro National High School, Eastern Cogon Elementary School, Dao Farmville sa Dao Elementary School sa Tagbilaran City ug Busao National High School sa Maribojoc.
Accredited na usab ang IYAAH Eco Farm sa San Isidro District, Tagbilaran, Egay’s Farm sa Bingag Dauis nga mga nagsubay sa IDF, GreenThumb Farm sa Sambog Corella nga nagpadaghan sa uhong (mushrooms) ug Mayor Lucas Asotigue Permaculture Farm nga nagtutok sa Diversified Permaculture Farming sa Triple Union, Catigbian.
Sa ikaduhang Distrito, accredited na ang Sikatuna National Agricultural High School sa Sikatuna, Talibon, Ubay Stock Farm, Dagon sa Hoyohoy Farm sa Babag, Dagohoy ug Teofil’s Garden sa Camambugan, Ubay, ang tanan pulos nagtutok sa IDF.
Sa ikatulo nga Distrito, accredited na sa ATI 7 ang Jolit’s Farm sa Cambacay Batuan, Oikos Place and Wellness Garden sa Zamora, Bilar, JQL Organic Farm sa Luyo Dimiao, Toting Farm sa Lagtangan Sevilla, Mayana Upper Sampong Organic Farm sa Sampong, Mayana, Jagna ug Labonite Family Farm sa San isidro, Pilar, tanan nagbansay sa Integrated Diversified Organic Farming System.
Niini, giaghat pa sa gobernador, kinsa nahimong kanhi kalihim sa Agrikultura, ngadto sa ATI nga ipadayon pa ang paghimo og mas daghang accreditation aron may mga duol nga lugar nga mahimong didto magkat-on ang tawo sa dugang teknolohiya samtang nagtutok sa pagpuno sa kan-anan sa mga Bol-anon.
Gani, didto sa susamang tigum, gibutyag ni Gob Yap nga tan-awon sa unta sa mga mag-uuma sa Bohol ang pag-ugmad sa agricultural raw materials ngadto na sa giproseso nga pagkaon kay niining paagi, mas madako pa ang kita-on kay sa ibaligya ang raw materials. (rahc/PIA-7/Bohol)