Dakbayan sa Tagbilaran napiling usa sa sunod nga ‘digital cities’ sa 2025 

Ni Elvira Bongosia, PIA

TAGBILARAN CITY, (PIA) — Ang syudad sa Tagbilaran giproklamar isip usa  sa sunod nga ‘Digital Cities’ sa 2025.

Sumala pa sa Department of Information and Communications Technology (DICT), uban sa ilang potensyal nga mamahimong  sunod nga IT hubs sa nasod, kining mga syudad makadawat og suporta ug kalamboan sa mosunod nga mga tuig nga magpasiugda sa ICT Industry and Development sa ilang mga lugar.

Gitawag nga “Digital Cities 2025: A Brighter Future Awaits in the Countryside,” kining programa namugna pinaagi sa partnership tali sa DICT, ang IT ug Business Process Association of the Philippines (IBPAP), ug Leechiu Property Consultants (LPC).

Matud pa ni IBPAP President Rey Ulnar, ang mga syudad napili base sa upat ka parameters – talent availability, cost, infrastructure ug business environment.

Ang Tagbilaran City sa lalawigan sa Bohol sa rehiyon 7 ug Tacloban City  sa lalawigan sa Leyte sa rehiyon 8 ang nasulod sa listahan. Kining duha  ka syudad parte sa DICT Visayas Cluster 2.

Matud pa nga kining mga syudad adunay dakung potensyal nga maapil sa ranggo sa mga mamahimong sentro sa industriya sa IT excellence cities sama sa Metro Cebu ug next wave cities sama sa Dumaguete City.

Si Tagbilaran City Mayor John Geesnell Yap II sa usa  ka pahayag nagpasalamat sa pagkaapil sa syudad sa Digital Cities 2025. 

Matud pa ni Yap nga bisan third class city lang ang syudad sa Tagbilaran, naningkamot ang iyang administrasyon nga makahatag og first class nga serbisyo. (ecb/PIA7-Bohol)