Ni Rey Anthony H. Chiu, PIA
CORTES, Bohol, (PIA) — Labing daghan ang nadakpan sa paglapas sa palisiya sa “social distancing,” kini segun sa taho sa mga kapolisan didto sa labing bag-o nga hiniusang tigum sa Provincial Peace and Order Council ug Provincial Anti-Drug Abuse Council niadtong milabay nga semana.
Nataho sa kapolisan pinaagi ni Police Senior Superintendent Joselito Clarito didto sa virtual nga tigum nga sa pagpatuman sa kapolisan sa mga palisiya sa pagpailawom sa Bohol sa Enhanced Community Quarantine (ECQ) gikan sa Marso 16 ngadto sa Hunyo 28, mikabat sa 6,660 ka Bol-anon ang nadakpan sa kapolisan sa pagsupak sa gilagda nga dili magpaduol sa usag usa tungod sa kakuyaw nga matakbuyan sa sakit.
Niadtong Marso 16, samtang ang Bohol gipailawom sa ECQ, nagpagawas si Gobernador Arthur Yap sa mga orden ehekutibo nga magpatuman usab sa mga sumbanan aron kamenosan ang pagkatag sa kagaw nga kina-ingnan sa coronavirus disease (COVID).
Dala sa mga lagda sa social distancing, napauso na ang online nga mga tigum nga apilan sa daghang mga tawo nga walay pisikal nga pagduol. Mao usab kini ang gihimo ni Gob. Art Yap sa iyang mga online meetings. Daghang Bol-anon ang nadakpan sa kapolisan kay wala magtamud sa lagda sa social distancing, segun sa kapolisan. (rahc/PIA-7/Bohol)
Ang mga orden ehekutibo numero 15 nagmandu sa pugos nga pagsul-ob sa face mask (hijaw) kon mogawas sa panimalay, samtang ang Executive Order No. 13 nagamandu sa kinatibuk-an nga paghabol sa Bohol sa curfew sugod also 9:00 sa gabii ngadto na sa alas 5:00 sa sayo nga buntag.
Gimandu usab sa gobernador pinaagi sa pinahaum nga orden ang pagkwarantina sa mga labaw sa 65 anyos ug mga menor de edad pinaagi sa Executive Order No 18, hinuon kini gihimoan na og mga palisiya nga magtugot sa pipila nga makagawas.
Ug sanglit alang sa buwan sa Mayo, daghan sa Bohol ang magpahigayon og mga pista pasalamat sa mga patron, gipagawas usab ang Orden Ehekutibo nga nagamandu sa partial nga liquor ban o ang pagdili sa pag-inum-inum sa mga publiko nga lugar ug pagtugot niini kon didto na lang himoon sa tagbalay sulod sa iyang balay, walay lain nga tawo nga moapil sa tagay.
Kini usab agi og pagtamud sa mandu sa Department of Health sa pagpahilayo gayud sa labing duol nga ika estorya, o ang social distancing.
Sa taho ni Colonel Clarito, gibutyag nga sugod sa Marso 16 ngadto sa Hunyo 28, 6,660 ka Bol-anon ang wala pa gihapon makatuhog sa panginahanglan nga dili magpaduol.
Dugang sa hepe sa kapolisan nga miabut usab sa 2,602 ka mga Bol-anon ang nangasakpan nga wala magsul-ob og face mask (hijaw) gawas sa ilang mga balay, supak sa orden ehekutibo.
Sa EO 13 o ang kinatibuk-an nga curfew sa Bohol, 815 ka tawo ang nadakpan, samtang miabut usab sa 711 ang mga menor de eadad nga gipasagdan sa mga ginikanan ug nadakpang naglatagaw gawas sa ilang mga balay segun sa mandu sa pagpujo.
Adunay 127 usab ka Bol-anon nga edaran na unta apan nagmagahi sa ulo ug mingsupak sa curfew for elders.
Sa mga mahiligon sa tagay, 550 kanila ang nadakpan nga nag-inum ug nahubog, supak sa mandu sa dili pagtapoktapok.
Subay gihapon sa social distancing, gipatuman usab sa kapolisan sa Bohol ang mandatus nga gipagawas sa Department of Transportation kabahin sa pagpadistansya sa mga pasahero sa mga sakyanang pangpubliko, ug niini, 892 ang nadakpan.
Sa kinatibuk-an, mingkabat sa 12,357 ang mga Bol-anon nga nakalapas sa mga palisiya sa curfew, panapos ni Clarito. (rahc/PIA-7/Bohol)