Ni Rey Anthony H. Chiu, PIA
Kapin sa 5,000 ka bata nga Bol-anon ang makabenepisyo sa P6 milyones nga Milk Feeding Program aron hatagan og solusyon ang nagkagrabe nga suliran sa pagkapotot, pagkagaan sa timbang ug sa pagkasakiton.
Kini matud pa ni Glenda Grafilo, nutritionist ug dietician sa Provincial Health Office, didto sa labing bag-o nga Kapihan sa PIA nga nagtuki sa timailhan sa pagkuwang sa nutrina sa mga kabatan-onan nga Bol-anon.
Gidugang ni Grafilo nga ang Milk Feeding Program nga magtutok sa mga kabataan nga natumbok nga may suliran sa nutrisyon sa 17 ka kalungsod, maghatag sa matag adlaw nga gatas sa mga nag-edad og 2 ka tuig ngadto sa 5 ka tuig, sulod sa duha ka buwan.
Hinuon, ang makabenepisyo, sila kadtong mga bata nga nakit-an sa mga pagsurvey nga gihimo sa mga Barangay Nutrition Scholars ug mga Barangay Health Workers nga may suliran sa pagkapotot nga makit-an sa edad sa bata kon itandi sa iyang katas-on, pagkaniwang nga makit-an sa timbang sa bata sa iyang edad ug katas-on ug pagkasakiton nga makit-an sa ubos nga timbang kon itandi sa katas-on.
But-on man sa Kagamhanan nga Probinsyal sa Bohol nga iapil ang tanan nga kabatan-onan nga makit-an nga may suliran sa malnutrisyon, dili gyud kini maatu pa, mao nga ang matumbok sa milk feeding program kadto ra nga mga bata nga potot ug grabe nga pagkapotot, segun usab sa surbe ug sa batakan nga gigamit sa World Health Organization.
Timbangon ang bata sa dili pa sugdan ang milk feeding ug usban og timbang kon mahuman na ang duha ka buwan aron makit-an ang diperensya ug masuta kon kining paghatag og gataw matag adlaw, makaepekto pa ba bisan kon ang bata, gawas na sa sabakan.
Matud sa mga nutritionists nga ang suliran sa pagkapotot, masulbad ra unta didto pa sa sabakan kon ang inahan naghatag pa sa saktong pag-amoma sa puya.
Gawas sa pagkaon sa saktong pagkaon nga awas sa nutrina, makatabang usab ang eksklusibo ng apagpatotoy sa gatas sa inahan, dugang ni Ardin Abrea, lain usab nga nutritionist didto sa Kapihan.
Ang Milk Feeding program sa Bohol mingsagop sa tema nga “COVID Wagtangon, Malnutrisyon Sumpoon,” ug niini, milaum ang Provincial Nutrition Council nga ang pagpainom sa gatas, may dako nga epekto sa kabataan, ilabi na sa Buwan sa Nutrisyon, nga nagtutok usab sa pagbuntog sa pagkapotot.
Ang Tema sa nasudnong paghandum sa Nutrition Month mao ang “Batang Pinoy, Sana Tall, Iwas Stunting, Sana All, Iwas All Din sa COVID-19.”
Kini usab maoy nahukman sa National Nutrition Council diha nga napakita sa Food and Nutrition Research Institute pinaagi sa survey sa 2018 nga miabut sa 33 percent sa mga kabataan sa nasud ang potot.
Dinhi sa Bohol, medyo arang-arang og dyutay kay naa lamang sa 31.9 porsyento ang pagkapotot, apan kini dili gyud mayo nga pasagdan, segun pa niya.
Kon unta ang bata naatiman pa og maayo samtang naa pa sa sabakan, ug ang nagsabak may paglantaw sa kaayohan sa iyang lawas ug sa bata nga nagsalig usab sa iyang nutrisyon, dili gyud unta ingon niini kadaku ang suliran sa pagkapotot.
“Crucial sa pagsolbad sa pagkapotot ang unang 1,000 ka adlaw sa bata gikan sa iyang pagpanamkon ngadto na sa duha ka tuig,” padayag ni Grafilo. (rahc/PIA-7/Bohol)