Ni Padre Jose “joesum” Sumampong, Jr.
—————————————————————
Ang Ika-17 nga Domingo sa Tuig (A)
Hulyo 26, 2020
EBANGHELYO (Mt 13:44-46) SHORT FORM
Si Jesus miingon ngadto sa Iyang mga tinun-an, 44“Ang Gingharian sa langit sama sa usa ka bahandi nga gilubong didto sa usa ka uma. Ug nahitabo nga hikalutan kini sa usa ka tawo, apan iyang gilubong pag-usab. Hilabihan niyang lipaya ug tungod niini milakaw siya ug iyang gibaligya ang tanan niyang katigayonan, ug unya mibalik siya ug iyang gipalit ang uma. 45Ang Gingharian sa langit sama usab sa usa ka negosyante nga nangitag maanindot nga mga mutya. 46Sa dihang nakakaplag siyag usa ka mutya nga may talagsaong kaanindot, milakaw siya ug gibaligya ang tanan niyang katigayonan, ug unya gipalit ang mutya.” Ang Ebanghelyo sa Ginoo.
oOo
KAHULOGAN SA EBANGHELYO (Mateo 13:44-46)
Si Jesus miingon ngadto sa Iyang mga tinun-an…
Sama sa tanang mga tig-asoy og mga sugilanon sa iyang panahon, si Jesus wala magsulti ginamit ang mga malisod sabtong termino. Kondili Iyang gigamit ang mga maanindot nga talan-awon kansang kahulogan masabtan sa tanan. Iyang giasoy kon unsa ang usa ka butang pinaagi sa paglarawan niini sa mga panghitabo nga sarang mahitabo diha sa atong palibot. Mao kini ang gitawag og sambingay.
Sa kasagarang mahitabo sa sugilanon nga gisaysay pinaagi ra sa paglitok niini kon oral expression. Ang pagbalibalik sa pag-asoy niini makapatuhog og dali sa pagkat-on sa unsay gipasabot nga pagtulun-an.
Bisan gani kon makausa ra ka higayon nga atong mapaminaw ang usa ka asoy nga gipaagi sa sambingay, daw dili na kini mahikalimtan. Ang mga batid miingon nga si Jesus migamit sa mga sambingay. Kini nakat-onan sa iyang mga tigpaminaw sa kinasingkasing gayod!
44a“Ang Gingharian sa langit sama sa usa ka bahandi nga gilubong didto sa usa ka uma. Ug nahitabo nga hikalutan kini sa usa ka tawo, apan iyang gilubong pag-usab.
Usa ka Bahandi! Matag usa ka tawo adunay iyang kaugalingong panabot kon unsa ang bahandi. Sa tibuok kasaysayan sa tibuok kalibutan, ang mga tawo adunay ilang giisip nga bahandi, nga mao ang angay kab-oton ug angay nga huptan.
Niadtong panahona wala pa mauso ang pagtigum sa bahandi sulod sa usa ka bangko. Ang ilang kasagarang gihimo mao ang paglubong sa bahandi ilawom sa yuta nga ilang gipanag-iya o giuma. Usahay mahitabo nga ang maong gilubong nga bahandi gipanag-iya na sa usa ka tawo nga namatay na, ug kini wala ikabutyag ngadto sa gibinlan sa maong yuta. Unya, usa ka mag-uuma o saop, samtang nagtikad niini, makakalot sa maong bahandi.
Sumala sa sambingay, ang nakakalot sa bahandi milubong pag-usab. Katingalahan! Unsa may iyang buhaton?
44bHilabihan niyang lipaya ug tungod niini milakaw siya ug iyang gibaligya ang tanan niyang katigayonan…
Tataw kaayo nga mao kini ang dugukang bahin sa sambingay.
Si Jesus buot nga mohagit kanato. Miuyon ba ikaw sa gibuhat sa tawo? Kon kini nahitabo kanimo mao ba usab kini ang imong buhaton?
Oo, kay sa atong kaugalingong kinabuhi makahimo man kita sa pagbuhat og dakong sakripisyo aron lamang maangkon ang unsay gihandom sa atong kasingkasing. Ang tinun-an magsigig tuon aron lamang makahuman sa iyang kurso. Ang magdudula sa basketball mohimog mga makuting lakang sa pag-ensayo kon siya buot nga mahimong sikat nga magdudula. Ang mga ginikanan magtrabaho aron makasuporta sa ilang mga nagatubong anak.
Matud pa ni Jesus ang gingharian sa langit hilabian ka bililhon nga dili gayod manuko ang usa sa paghimog dakong sakripisyo aron lamang sa pag-angkon niini.
Timan-an nato nga sa maong sakripisyo anaa ang gibating kalipay. Sa ato pa, dili kontra sa buot. Ang sakripisyo diay gikalipay, dili gikasakit!
45 Ang Gingharian sa langit sama usab sa usa ka negosyante nga nangitag maanindot nga mga mutya. 46aSa dihang nakakaplag siyag usa ka mutya nga may talagsaong kaanindot…
Susama ra sa unang sambingay. Apan kon susihon adunay diyutay nga kalainan: Ang mag-uuma nakakaplag sa bahandi nga wala tuyoa o by chance; apan ang negosyante mituyo gayod sa pagpangita sa bahandi.
Kitang tanan nangita usab sa makalipay kanato. Apan subo usahay nga ang atong gipangita mga baratohong kalipay lamang, mga kalipay nga mabaw ra kaayo ug dili malungtaron.
Si Jesus nasayod kon unsay labing makalipay sa tawo. Kini maoy buot Niya nga pangitaon kanato. Walay molungtad nga kalipay kondili kadto lamang makapahiusa kanato sa Dios! Mao kana ang gitawag ni Jesus og Gingharian sa Langit!
Aron mapuy-an ta ang kinabuhi nga anaa ang labing bililhon ug labing makabuhong nga kalipay—aron mapanag-iya ang maong maanindot nga mutya—unsa may akong buhaton?
46bmilakaw siya ug gibaligya ang tanan niyang katigayonan, ug unya gipalit ang mutya.
Tingali ang mga tawo nga unang nakadungog sa gisulti ni Jesus kabahin sa tawo “nga mibaligya sa tanan niyang katigayonan” nakaingon, “Kining tawhana nabuang!”
Apan kong atong tinud-on sa pagsusi, ang ubang tawo wala gayoy kasayoran sa hilabihang kaanindot sa nakit-ang mutya. Nasayod siya nga bisan pa kon iyang ibaligya ang iyang tanang katigayonan dili gayod siya malugi o maalkanse.
Si Jesus naghagit kanato sa paghimog bug-at og lawom nga desisyon. Pagbaligya sa tanan, kana dili isapayan kay anaa may mas bililhon pa nga ato unyang maangkon. Mao nga siya mismo misagop sa kamatayon aron lamang kita mabuhi!