BAG-ONG NORMAL
Ni Mario Iyog
Pag-abot ni corona nausab ang tanan,
Batan-on ug tigulang maoy natamaan,
Dili na basta-basta makagawas sa kadalanan,
Mura’g binilango sa kaugalingong pinuy-anan.
Kaniadto may pabiso-biso,
Karon may pakomo-komo,
Nawagtang ang lamano-lamano,
Social distancing gipatuman hugot kaayo.
Kaniadto adlaw-adlaw mosimba,
Karon sa balay na naninaw sa Misa,
Adlaw-adlaw tang mokalawat,
Si Kristo sa “online” na natong gidawat.
Mga asawa dakog panahon sa bana,
Mga bana naa sa balay uban kanunay sa asawa,
Mga anak way la-ag uban sa barkada,
Gihiusa ni corona ang atong pamilya.
Kaniadto ang patay lamayan,
Ang lamay gihimong sugalan,
Karon ang patay sunogon dayon,
Mga sugarol dili ka-antog sa antogon.
Karon menus exercise sigeng kaon,
Delikado kaayo atakihon,
Maghunahuna ta unsay buhaton,
Aron dili ma-apsan sa suwab sa kamatayon.
Sa FB, mag-post birthday ug kamatayon,
Mao ni ang trend sa pagkakaron,
Kabalaka ug kahadlok nagtukmod nato nga masakit na hinoon,
Dangop ta sa pag-ampo, ang labing mahinungdanon.