Ni Elvira Bongosia, PIA
Gilagdaan na ni Presidente Rodrigo Duterte ang balaodnon nga maghatag og gahom kaniya nga isibog ang petsa sa pagbukas sa klase nga lahi sa gitakda sa balaod.
Niadtong Biyernes, Hulyo 17, gilagdaan ni Duterte ang Republic Act 11480 nga nag-amyenda sa RA 7797 partikular ang parte nga nag-ingong ang pagbukas sa klase angay himuon sulod lamang sa unang Lunes sa Hunyo ug dili molapas sa katapusang adlaw sa Agosto.
Sa bag-ong gilagdaang balaod, tugotan si Presidente Duterte base sa rekomendasyon sa kalihim sa Department of Education (DepEd) nga magtakda sa laing petsa kun may deklarasyon sa state of emergency o state of calamity.
Sakop niini ang tanang basic education schools apil na ang mga foreign ug international schools.
Gimanduan usab ang DepEd sa pagtakda sa pagtapos sa school year diin i-konsiderar ang Christmas ug summer vacation ug uban pang kondisyon sa matag rehiyon nga angay ikonsiderar.
Samtang gitugotan usab ang pagpahigayon og klase matag adlaw nga Sabado alang sa elementarya ug sekondarya nga lebel alang sa mga pribado ug pampublikong mga tunghaan.
Mahimong epektibo kining balaod human dayon sa opisyal nga pagpamantala niini sa Official Gazette o sa mga pahayagan.
Ang DepEd usab ang magmugna sa implementing rules and regulations (IRR) sulod sa 30 ka adlaw human sa effectivity date. (ecb/PIA7-Bohol)