Ni Elvira Bongosia, PIA
Gi-uswag og usa pa ka buwan sa Government Service Insurance System (GSIS) ang panahon alang sa pagduso og aplikasyon sa COVID-19 Emergency Loan.
Sa usa ka pahayag, miingon si GSIS President ug General Manager Rolando Ledesma Macasaet nga hangtod Agosto 12, 2020 pa mahimong mo-file og loan applications ang ilang mga miyembro.
Kini tungod kay matud pa gusto nilang mahatagan og igong panahon ang ilang miyembro, apil na ang mga senior citizens ug disability pensioners nga apektado sa public health crisis aron makahulam.
Sa ilang banabana, mahimong mokabat sa kapin 1.3 milyon ang kwalipikado alang sa maong loan program nga may projected total amount nga P43 bilyones.
Una nang gisaka sa GSIS ang kantidad nga mahimong hulamon sa ilang mga miyembro gikan sa kaniadtong P20,000 nga sa karon mokabat na hangtod P40,000 alang sa mga adunay existing loans.
Gipadali na usab sa GSIS ang terms alang sa renewal sa loans bisan pa kon may loan accounts nga wala na bayran og kapin sa unom ka buwan. (ecb/PIA7-Bohol)