Ni Elvira Bongosia, PIA
Ni Elvira Bongosia, PIA
Ang containerized molecular laboratory sa kagamhanang probinsiyal gi-instalar na niadtong Lunes sa buntag, Hulyo 20, 2020 sulod sa Bohol Medical Care Institute (BMCI) compound sa dalan J.A. Clarin Ave. ning Dakbayan sa Tagbilaran.
Ang maong molecular lab nga niabot dinhi niadtong Biyernes sa gabii, Hulyo 17 gikan sa Manila e-test sulod sa usa ka semana sa dili pa kini e-deklarang ‘fully operational.’
Sa pagka-instalar sa maong molecular lab, gipaabot nga makatabang kini sa pagpakusog sa kapasidad sa coronavirus disease 2019 (COVID-19) testing sa Bohol diin ang lalawigan dili na magsalig sa sub-national laboratory nga nahimutang sa Vicente Sotto Memorial Medical Center (VSMMC) sa syudad sa Sugbo.
Kahinumdoman nga niadtong Hulyo 12, 2020, si Gob. Arthur Yap mibutyag nga ang lalawigan mopalit og containerized molecular lab nga mo-abag sa molecular lab nga nahimutang sulod sa Gov. Celestino Gallares Memorial Hospital (GCGMH).
Ang labing unang molecular lab sa GCGMH gipaabot usab nga mamahimong operational sulod ning buwana tungod kay nakasugat pa kini og pipila ka pagkalangan.
Ang containerized lab nga nahimutang sulod sa BMCI gipaabot nga mamahimong operational 24 oras matag adlaw nga may kapasidad nga 300 test results output matag adlaw.
Ang gobernador nitumbok na kaniadto pa nga ang testing capability ug contact tracing ang yawe nga maka-abli sa lalawigan sa Bohol sa pagdawat og mga bisita ug makasugod sa industriya sa turismo. (ecb/PIA7-Bohol)