Ni Rey Anthony H. Chiu, PIA
Giaghat sa Provincial Disaster and Risk Reduction and Management Council ang mga lokal nga kagamhanan nga mosuwat ngadto sa gobernador aron makakuha sila sa libre nga mga bansaybansay, ilabi na sa community lockdowns ug contact tracing, niining panahon nga nagkalapad ang hulga sa community transmission sa sakit nga coronavirus (COVID-19).
Dungan sa paghandum sa National Disaster Resilience Month sa Hulyo, mipahinumdom si PDRRM Officer Anthony Damalerio PhD, nga bisan pa sa pandemya, nagpadayon ang ilang buhatan sa pagtanyag sa mga bansaybansay lakip na niini ang simulation exercises (SIMEX) sa Barangay Lockdown and Contact Tracing samtang nagpahaum sa tema nga Sama-samang Pagsulong Tungo sa Katatagan sa Gitna ng Bagong Normal.
PDRRMO Damalerio
Gitaho ni Dr. Damalerio didto sa Kapihan sa PIA nga 23 na ka lokal nga mga kagamhanan lakip na ang dakbayan sa Tagbilaran ang nakahimo na sa simex sa Barangay Lockdown ug Contact Tracing Training.
“Ready ta, at no cost kini,” saysay ni Dr. Damalerio, samtang nagpasabut sa mga bansaybansay nga ila karon nga gipadayon bisan pa man nga may mga gipatuman nga mga palisiya kabahin sa pagpugong sa pagkuyanap sa COVID-19.
“Nananghid kita sa IATF on the Management of Emerging Infectious Diseases, ug gani tungod niini, limitado lamang ang mga tawo nga atong tugotan mga moapil sa bansay aron masunod gayud ang gimandu alang sa social distancing,” paambit sa hepe sa konseho nga nagpahimutang sa mga lakang sa paglikay sa epekto sa katalagman.
“Importante nga masayud ang mga tinugyanan sa lokal nga kagamhanan sa mga gimbuhaton ug mga protocols sa lockdown, aron mapangandaman og maayo ang desisyon nga maghimo niini ug aron masinati sa mga residente ang sistema ug wala nay magpanik sa higayon nga may ipahigayon nga lockdown sa mga lugar,” pasabut niya.
“Wala gayuy perfect nga simulation exercise, apan mas maayo na lang nga una na nga mahibaw-an sa kadaghanan ang mga gimbuhaton aron mas mapangandaman ang pag-abut sa sitwasyon,” butyag ni Dr. Damalerio.
“Ang kasagaran nga mga protocols usab nga gisunod sa mga lockdowns mao ang pagsawhanay sa responsibilidad sa Philippine National Police, Bureau of Fire Protection, Department of Health ug sa local nga kagamhanan, mao nga mahinungdanon gayud nga magkasabut ang mga ahensya sa pagpatuman sa ilang tagsa-tagsa ka mga responsibilidad kon may mahitabo man ugaling nga ingon niini, dugang ni Dr. Damalerio.
Ang mga lockdowns, kanunay nga isipon nga security matter mao nga kinahanglan gayud ang hugot nga pagpakiglambigit sa mga kapolisan ug mga tinugyanan sa local nga kagamhanan, palubad ni Damalerio. (rahc/PIA-7/Bohol)