Ni Elvira Bongosia, PIA
Nipasidaan ang Food and Drug Administration (FDA) sa publiko kalabot sa mga mapalit nga bakuna batok sa coronavirus disease 2019 (COVID-19) sa internet.
Sa gipagawas nga pahayag sa FDA, gipasabot sa buhatan nga wala pa silay gi-aprobahan nga bakuna batok sa virus tungod kay naa pa lamang kini sa ‘developing stage’ ug wala pa nakumpleto ang clinical trials aron mapamatud-ang luwas ug epektibo gayud kini.
Tungod niini, gi-awhag sa FDA ang publiko, mga lokal nga kagamhanan ug mga tigpatuman sa balaod nga magbinantayon sa mga tawong nagbaligya sa mga giingong bakuna batok sa COVID-19 ilabi na ang mga gibaligya online.
Samtang gitumbok usab sa ahensiya nga kun kinsa man ang madakpang nagbaligya og mga ilegal nga bakuna, manubag gayud sa balaod ubos sa Republic Act No. 9711 o mas gi-ila sa Food and Drug Administration Act of 2009.
Karong panahon sa pandemya, gi-awhag ang publiko nga magpabiling magmatukawon sa pagpalit ug paggamit sa mga health products.
Gi-awhag sa FDA ang publiko sa pagsumbong sa mga kadudahang pag-angkon, gibaligya o advertisement nga nag-angkon isip bakuna batok sa COVID-19 pinaagi sa pag-email sa covidresponse@fda.gov.ph o motawag sa (02) 88095596. (ecb/PIA7-Bohol)