Goberno mitunol sa hinabang ngadto sa mga rebelde nga mipili sa kalinaw

Ni Rey Anthony H. Chiu, PIA

Kwarta nga dili gyud igkita ug maangkon sa usa  ka tawo nga pabilin nga naglatagaw sa kabukiran sa pila ka katuigan aron ipatunhay ang bakak nga mga saad.

Kini human nadawat sa upat ka kanhi mga youth organizer leaders sa New People’s Army (NPA) ang P235,000 nga abag gikan sa kagamhanan aron makasugod sila sa pagpanginabuhi nga malinawon

Ang upat, kinsa nakahukom nga motapon na sa kagamhanan, dala ang ilang mga armas, aron mabuhi nga malinawon, maoy labing bag-o nga pruweba nga matinud-anon ang kagamhanan sa iyang kampanya sa pagtapos na sa lokal nga armado nga pakigbisog ug pagpatunhay sa kauswagan diha sa pagpalapad sa kalinaw.

Ang kwarta nga nadawat maoy hinabang sa kagamhanan pinaagi sa Enhanced-Comprehensive Local Integration (E-CLIP) Program, aron may kasugdan nga negosyo samtang magsugod sa bag-ong kinabuhi, matud pa ni 47th Infantry Battalion Civil Military Operations Officer 1Lieutenant Elma Grace Remonde-Arbulencia.

Mismo si Gobernador Arthur Yap ang mingtunol sa tseke nga nagbalor og P50,000 ngadto kang “Ka Arlene;” P15,000 ngadto kang “Ka Goliat;” P95,000 ngadto kang “Ka Ernie,” ug P75,000 ngadto kang “Ka Asyong” atul sa yano nga seremonyas dungan sa ART 160 Caravan niadtong Hulyo 25, 2020 didto sa Mabini ug Alicia Bohol.

Ang mga mingtahan nga nagdala sa high powered fire arms may madawat usab nga dugang sa iyang hinabang sama usab sa magtahan nga may dala nga low powered fire-arms.

Bitbit usab ang mga armas ug  ang pakyas nga mga saad nga wala gayud matuman, mingtahan ang upat human inay kinabuhing haruhay sumala sa gisaad, pagtagotago, kagutom ug kanunay nga kahadlok nga maapsan sa mga sundalo ang permi nga masinati sukad sa unang adlaw sa ilang pagtipo sa kalihukang walhon hangtud sa ilang pagkahamtung.

“Mangatulog sa mga kasagbutan, sa mga kabato-an, pait ilabi na kon mouwan ug nagkutoy pa gyud ang tiyan. Matag gabii sa among paglakaw, kanunay nga naa sa among hunahuna nga basin og maapsan ra gyud mi sa mga sundalo. Kanunay ming manaway sa ka-walay hinungdan sa goberno, samtang ang gamay nga suporta nga gisaad, mao lamang ang nagpakaon sa gibiyaan nga pamilya. Pila ka tuig pod kong nanimuyo sa bukid uban nila, nanghinaot nga matuman na ang mga saad apan wala. Karon nga mibalik na ko sa sabakan sa kagamhanan, nakita nako nga   ang goberno ra ang makatabang nako nga manimuyo nga malinawon, butyag ni Ka Ernie, kang kinsa nga pangalan ug identity, hugot nga gihupan sa mga kasundalohan aron pagpanalipod kaniya sa pagbawos.

Ang E-CLIP maoy pamaagi sa kagamhanan nga buksan ang ganghaan alang sa mga nasaag nga sakop sa terorista nga komunista’ng kalihukan aron mahimo silang modangop sa kagamhanan ug manimuyo sa kinabuhi nga tarung ug malinawon uban sa mga sakop sa pamilya.

Kini nga programa local nga gipatuman gipangunahan sa Department of Interior and Local Government kauban ang Provincial Social Welfare and Development Office, ang Philippine National Police, Philippine Army ug mga kahugpungan nga andam usab motabang sa mga kanhi rebelde.

Kini usab ang matuod nga adbokasyoa sa kagamhanan sa pagtapos na sa armadong pagpakigbisug dinho sa nasud nga nakakalas na sa daghanang inosente ug kadtong nahaylo sa bakak nga saad.

“Nagpasalamat ako sa atong gobernor sa tabang nga iyang gihatag kanako ug sa akoa nga banay. Manawagan ako sa mga kanhi namo nga kauban sa kabukiran sa pagpakaug  na diri sa patag aron mopuyo nga malinawon. Naglaum ako nga inyo na nga masabtan nga ang rebelde dili makasalbar kanato, gani ang rebelde magpangayo pa ngani sa masa. Biyai na ang armadong grupo ug dangop sa programa sa kagamhanan aron makasugod na sa maka usa pa, nga mabuhing wala nay kahadlokan pa,” panawagan ni Ka Arlene.

Subay niini, matud pa ni 1Lt Remonde-Arbulencia, ang 47IB padayon pa nga nang-aghat sa mga kaigsoonan nga mobalik na sa patag aron ikauban na ang banay ug manimuyo nga malinawon. Sinsero ang kagamhanansa kampanya nga ipatunhay na ang matuod nga kalinaw nga gipangandoy sa tanan. (rahc/PIA-7/Bohol/47IB)