Nakatala ang lungsod sa Balilihan sa laing kumpirmadong kaso sa Covid-19. Ang maong kaso mao ang usa ka locally stranded individual (LSI).
Kini maoy gibutyag ni Governor Art Yap niadtong adlaw Domingo, Agosto 2, 2020, human ang Department of Health (DOH) Region 7 nipahibaw kaniya nga adunay usa ka LSI nga nagpositibo sa reverse transcription-polymerase chain reaction (RT-PCR) test.
Matod ni Yap nga nagpabiling gi-isolate ang pasyente hangtod karong panahon didto sa sa isolation center sa Balilihan, Bohol.
Gipahibaw na usab niya si Balilihan Mayor Pureza Chatto kabahin sa resulta ug gimandoan na usab ang Provincial Health Office nga makig-alayon ngadto sa Rural Health Unit (RHU) sa Balilihan alang sa pagpahigayon sa “contact tracing”. Subay niini, padayon ang pag-aghat ni Yap ngadto sa tanan nga magbaton nga disiplinahon gyud ang kaugalingon ug sundon ang gipatumang minimum health standards” aron makalikay sa Covid-19 nga virus.