Ni Elvira Bongosia, PIA
Uban sa ideya nga ang blogging ug video blogging (vlogging) usa ka paagi sa pagdasig, paghatag og gahum ug edukar sa kalibutan taliwala sa pandemya, ang Agricultural Training Institute – VII (ATI-7) nipahigayon og Bloggers’ Forum alang sa mga information officers sa kalungsoran ug mga ahensiya sa nasudnong kagamhanan sa lalawigan sa Bohol.
Gitambongan kini sa mga miyembro sa Association of United Development Information Officers (AUDIO) Bohol niadtong Hulyo 29 ug 30 didto sa Jolit’s Eco Garden sa Barangay Cambacay sa lungsod sa Batuan ug sa IYAAH Eco Farm sa Barangay San Isidro ning syudad.
Gitunga sa duha ka batch ang grupo nga adunay minimum nga gidaghanon sa mga nitambong alang sa sayon nga pagpatuman sa social distancing.
Giorganisar sa panag-uban sa AUDIO-Bohol nga gidumala sa Philippine Information Agency (PIA), ang maong Blogger’s Forum gitumong aron mahatagan og kapasidad ang mga information officers nga mahimong mas ‘pro-active’ sa pagpakatap sa kasayoran sa nagkalain-laing channels karon nga ang mga katawhan moadto na sa internet alang sa ilang gikinahanglang impormasyon.
Paagi usab kini sa ATI-7 aron mapailaila ang ekstenyon nga serbisyo sa ahensiya ilabi na ang ilang mga Learning Sites alang sa agriculture modality samtang makat-on sa makapaikag nga plataporma sa komunikasyon nga mao ang blogging ug vlogging.
Pagsulay usab kini sa ATI-7 sa paghibalag sa blogging ug vlogging nga social media platforms sa pagpakatap sa mga maayong balita kalabot sa lalawigan sa Bohol ug sa pagpaningkamot niini sa seguridad sa pagkaon ning panahon sa pandemya.
Nipaambit sa iyang kahanas sa Microblogging, si Jhuriz Dugaduga sa Bohol Bloggers Collective kinsa nihisgot kalabot sa Blogging Government Development samtang ang inilang content creator video ug photographer sa Travel 29 nga si Rowell Clenuar nitudlo sa mga partisipante kalabot sa Vlogging techniques.
Ang maong Bloggers’ Forum naghatag og kahigayonan kang Jomer Balag sa Jolit’s Eco Garden ug Robert Olaer sa IYAAH Eco Farm sa pagpailaila sa ilang farm ug pagpakita sa agricultural technology nga ilang gigamit samtang nisuroy sa ilang farm ang mga nitambong sa maong forum.
Ang maong mga learning sites, duha lamang sa 20 ka aktibong LS sa Bohol Learning Site nga nagsilbing demonstration area alang sa hands-on learning diin ang mag-uuma magsilbing resource speaker, kakuhaan sa teknolohiya, magpakita sa magamit nga teknolohiya ug estratehiya sa panguma. Ang maong mga Learning Sites magsilbi usab nga field visit area alang sa ubang mag-uuma ug mga nahilig sa agrikultura samtang mokita ug mo-ginansiya.
Ang AUDIO-Bohol President nga si Fiel Angeli A. Gabin nagkanayon nga ang Bloggers’ Forum naghatag kanilang mga information officers og oportunidad sa pagpa-ambit sa ilang kahibalo gamit ang mas makapea-enganyo nga plataporma.
“Bloggers’ Forum gives fellow information officers an opportunity to share our knowledge using a more interesting platform, refining our communication skills when we do or write our blogs and expand our professional network,” matud pa ni Gabin.
Samtang ang ATI information Officer nga si Doris Isabel Racho mipaambit usab kun giunsa ang pagbansay sama sa Bloggers’ Forum nga makatabang kanila sa paghimo sa ilang mandato sa agricultural information. (ecb/PIA7-Bohol)