Ni Rey Anthony H. Chiu, PIA
Midugang ug hangyo ang Department of Education (DepED) Bohol Division ngadto sa mga lokal nga kagamhanan (LGUs) nga unta, katabangan na usab sila sa pagpahimutang sa mga locally funded learning facilitators nga makatabang sa mga bata nga naglisud sa pag-apas sa gisagop nga Distance Learning Modality.
Didto sa Kapihan sa PIA, gipalanog ni Assistant Division Superintendent Dr. Casiana Caberte ang panginahanglan sa learning facilitators agi og pagtubag sa suliran sa mga kabataan nga walay maguwang o ginikanan nga makatabang sa paghimo sa mga gimbuhaton nga nasukip sa mga learning modules nga gihuptan sa bata.
“Naay mga ginikanan nga walay panahon nga makalingkod uban sa bata tungod sa trabaho, adunay mga bata nga gibilin lamang sa mga apohan samtang ang ginikanan nangitag kapanginabuhi-an o tua nagtrabaho sa layo, dunay wala gyud igsoon nga makatabang, kini sila nanginahanglan sa paggiya subay sa leksyon nga naa sa modules,” pasabot ni Dr. Caberte.
Dugang pa, may mga ginikanan usab nga dili na makaapas pa sa mga leksyon sa mga bata karon, ug dagway og mas maglibog na hinuon ang bata sa gitudlo.
Dinhi, magamit ang mga learning facilitators.
Sa sugyot sa Bohol Division, ang mga Learning Facilitarors mao kadtong mga mingtapos sa kurso sa Education apan wala pa makasulod og trabaho, ug nabansay na sa mga gikinahanglan nga buluhaton sa pagtudlo.
Hangyo sa DepED, basin pwede nga sila ang patrabahoon sa LGUS aron maka-abag sa mga tumbok nga mga bata nga walay makatabang sa ilang modules.
Kini samtang ang Distance Learning Modality nga gisagop sa DepED naghimo sa mga leksyon nga matan-aw sa telebisyon, madungog sa radio o sa USB players, ug mabasa usab gamit ang printed modules.
Kahinumduman nga ang mga LGUs matud pa sa DepED, miabag na sa galastohan sa pagpapatik sa mga learning modules nga gipang-apod-apod sa mga bata.
Matud pa ni Dr. Caberte, hangtud sa mga 25 porsyento ra ang ilang makuha nga budget alang sa pagpa-imprinta sa mga modules, ug kon wala pa ang tabang sa LGUs, hayan maglisud na sila og produce sa mga learning materials.
May mga kalungsuran nga ming-realign sa ilang Special Education Fund sanglit wala pa man usab mahitabo nga face-to-face classes, ug ang pundo gigamit na lang alang sa produksyon sa modules.
Pinaagi sa SEF, mahimo usab nga kini maoy gamiton sa lungsod aron pangsweldo sa mga Learning facilitators nga maoy mapadala sa pag-abag sa mga bata nga walay ikaabag sa pagkat-on.
Dili gyud physically ma-atul sa usa ka maestra nga tagsa-tagsaon og duaw ang bata samtang anaa sa ilang panimalay nagkat-on sa modules, sumbong ni Dr. Caberte.
Dinhi, kon makapanghire man ugaling sa mga learning facilitators, gawas nga dako sila og ikatabang sa mga bata, makapadugang pa usab kini sa employment aron makatampo sa pagbangon sa ekonmomiya segun pa sa mandu sa Presidente, panapos ni Dr. Caberte. (rahc/PIA-7/Bohol)