Ni Rey Anthony H. Chiu, PIA
Giaghat na sa kagamhanan pinaagi sa Department of Trade and Industry (DTI) ang mga lokal nga kagamhanan sa nasud sa pagpalugak sa ilang mga curfew taman sa tunga nga gabii aron katugotan ang mga katawhan nga makakaon sa gawas samtang magpabiling bukas ang mga kan-anan taman sa alas 11:00 sa gabii.
Kini maoy usa sa mga unod sa DTI Memorandum Circular 20-39 series of 2020 nga nagpadaghan na sa serving capacity sa mga napaabli nga restaurants sa mga lugar nga nadeklara na nga ubos sa Modified General Community Quarantine (MGCQ) ngadto na sa 75 porsyento nga kapasidad.
Dinhi sa Bohol, human nahimong public health concern ang corona virus disease, gitabon sa kinatibuk-an nga lalawigan ang curfew nga magpugong sa mga tawo nga makagawas gikan sa alas 9:00 sa gabii ngadto na sa alas 5:00 sa buntag.
Dugang pa, wala itugot ang paggawas-gawas sa mga senior citizens ug sa mga menor de edad gawas lamang sa pipila ka mga adlaw nga gitagana alang sa ilang mga labing importante nga lakaw.
Sa tibuok nasud, walay senior citizens ug mga menor de edad nga tigutotan sa paggawas-gawas.
Sa MC 20-39, gisugyot sa DTI nga ang mga kan-anan mahimong magbukas taman sa alas 11:00 sa gabii aron mas daghan ang ilang masilbihan ug mas dako ang posibilidad nga mapun-an ang kita sa ilang mga trabahante.
Segun pa sa DTI, ang lakang sa MC, nagasuporta usab sa kabubut-on sa kagamhanan nga kahatagan ang mga restaurants sa mas lapad nga kahigayunan nga magasilbi og mas daghan, ilabi na kay 75% lamang ang gitugot nga makakaon sa sama nga higayon sa mga lugar nga ubos sa MGCQ.
Gawas pa, ang mas taas nga oras sa serbisyo sa mga kan-anan, dine in establishments, canteens, food courts, food parks ug eateries makadugang sa kitaon unya sa mga trabahante.
Gani, sa mga lugar nga ubos sa General Community Quarantine, 50 porsyento lamang ang mahimong masilbihan sa dungan nga higayon.
Niini nga sitwasyon, gihangyo na sa Bohol Chamber of Commerce and Industry (BCCI) ngadto sa gobernador nga ilibkas na ang one household one home quarantine pass, apan wala pay aksyon ang gobernador.
Saysay ni Gob. Arthur Yap, mahimo nga anam-anamon pa usab niya og pangutana ang mga mayor kon tugotan ba usab nila ang hangyo, samtang nagsugod na ang community transmissions sa COVID sa Bohol.
Matud pa sa mga sakop sa BCCI, bisan pa kon bukas na ang mga kan-anan, dili pa gihapon nila mapaabut nga mokita ang negosyo kay talagsaon ra nga may mokaon nga mag-inusara.
Ang dining out, usa ka social nga kalihukan ug sagad kini nga kuyogan sa amahan, inahan ug anak, o mga kabarkada nga mga kabatan-onan.
Apan kon magpabilin ang palisiya sa Home Quarantine Pass, wala pa gihapoy alibyo bisan pa kon gitugot na unta sa DTI.
Ang lakang nga gihimo sa DTI agi na usab sa pagtubag sa hangyo sa Presidente nga hinayhinayan na og abli ang mga establisemento sa mga lugar nga wala na kayo ang hulga sa sakit nga mananakod, aron makaginhawa na ang ekonomiya. (rahc/PIA-7/Bohol)