Ni Rey Anthony H. Chiu, PIA
Dili mga bata ang mogawas og moadto sa mga tunghaan kay wala pay pag-atubang ug pagtapoktapok nga gitugot gawas pa nga wala pa tugoti ang mga bata nga mogawas sa pagbukas sa school year 2020-2021 karong Agosto 24.
Subay niini nga pasalig, giaghat usab sa Deppartment of Education (DEPED) Bohol ngadto sa mga ginikanan ilabi na sa mga may anak nga nagtungha niadto sa private schools sa pagpa-enrol na sa mga bata aron mabanabana na sa DEPED ug mga tunghaan kon pila ka modules ang ila nga himoon alang sa mga magakat-on.
Hinuon, sa dili pa ang Agosto 24, ang ginikanan, mga guardians, maguwang sa bata ang moadto sa mga tunghaan aron magkuha sa mga learning modules nga diin makuha sa bata ang leksyon sa mga subjects niya bali og usa ka semana.
Kini maoy gipasabut ni Assistant Bohol Division Superintendent Dr. Casiana Caberte, didto sa Kapihan sa PIA niadtong Huwebes.
Walay angay kahadlokan ang mga ginikanan kay bisan pa kon magbukas na ang school year, wala pa gihapoy face-to-face classes nga mahitabo subay sa mandu ni Presidente Rodrigo Duterte.
Sa iyang opisyal nga pamahayag, matud sa Presidente nga dili una niya tugotan ang pagbukas sa face to face classes hangtud nga may magamit na nga bakuna batok sa Corona virus.
Didto sa kapihan nga nabati sa DyTR AM, sa Bee FM 92.7 ug sa PIA Bohol FB, gipasabut ni Dr Caberte nga ang DepED Division of Bohol mipili sa Distance Learning Modality ug blended learning modality aron mapadayon ang pagkat-on sa mga bata bisan pa kon anaa lamang kini sa ilang mga panimalay.
Sa Distance Learning, mahimo nga magbase sila sa dili dungan nga pagkat-on (asynchronous) kay gisulod na sa gipatik nga senemana nga modules ang kat-onan sa bata subay usab sa gitawag og Most Essential Learning Competencies (MELC).
Sa modules nga makuha, mahimo nga kini gipatik sa papel, o gisulod na sa Universal Serial Bus (USB) aron isaksak na lang sa computer sa mga adunay computer sa balay, o isaksak sa USB players aron makita ug madungog sa mga kahimanan alang niini ang mga leksyon nga gitagana alang sa semana.
May nga tunghaan usab nga maghimo sa ilang mga klase sa online classrooms sa ZOOM, Google class o sa facebook live, apan hinuon, matud pa sa DepED, dako nga hagit ang pagseguro nga may kasaligan nga internet connection ug may gadgets ang bata alang niini.
Gihangyo usab sa DEPED pinaagi ni Dr. Caberte ngadto sa mga kauban sa bata sa balay nga tabangan ang mga bata sa pag-human sa ilang mga leksyon nga naa sa module, aron magiyahan sila sa sakto nga mga paagi.
Kini samtang giangkon sa DepED nga dili gyud maatul sa mga maestro nga tagsa-tagsa-on og subay ang mga bata kon natunong ba ang ilang nakuha nga learning competencies alang sa usa ka semana.
Dugang ni Dr. Caberte, may mga learning activities usab nga pataban sa modules nga kinahanglan nga himoon sa bata ug ibalik pagpasa sa DepED sa panahon nga ang ginikanan sa bata moadto na usab sa mga tunghaan aron magkuha sa sunod nga mga modules. (rahc/PIA-7/Bohol)