Ni Rey Anthony H. Chiu, PIA

Niay maayong balita alang sa mga micro, small ug medium enterprises (MSME) nga wala na makaapas pa sa pag-apply sa Department of Trade and Industry Covid 19 Assistance to Restart Enterprises (CARES).

Sugod niadtong Lunes, Agosto 17 gibuksan na usab sa DTI Small Business Corporation (SBCorp) ang ilang Programa sa online Borrower Registration System (BRS), nga tawgon na karon sa DTI CARES 2, aron mas mailhan nga sahi sa una nga gitanyag.

Ug kon kaniadtong una nga CARES, moduso lamang sa application sa DTI pinaagi sa mga Negosyo Centers, karon, bukas alang sa CARES 2 ang online BRS sa SBCorp nga makit-an sa https://brs.sbgfc.org.ph ug diin dinhi mopasa sa application ang mga interesado nga mohuwam.

Matud sa DTI, wala nay manual nga applications ang dawaton.

Matud sa DTI Bohol pinaagi ni Jerome Gabin atul sa BIATF StratCom online meeting Agosto 12, bukas ang CARES 2, nga puparehas og matang sa CARES 1, ngadto sa MSEs nga nagpadagan na sa negosyo sulod sa labing menos usa kia tuig sa wala pa ang Marso 2020, ug kang kinsa nga negosyo, naapektohan og daku sa nagpadayon nga pandemya.

Kadtong mga micro enterprises nga may asset size nga dili mosobra sa P3 milyones makahuwamn og P10 mil ngadto sa P200 mil, ang small enterprises nga may asset size nga dili molapas sa P15 milyones makahuwam og gikan sa P500 mil.

Gawas sa 6 porsyento nga service fees, wala nay interes o patong ang huwam sa CARES 2 ug kini mabayran sulod sa 18-ka buwan ug 8% nga service fee alang sa 30-ka buwan nga binayranay.

Gani, sanglit alang kini sa mga apektado sa COVID, mahimo pa nga moavail sa unom ka buwan nga grace period.

Gawas niana nga mga rekisitos sa CARES 1, ang mga aplikante sa CARES 2 gikinahanglan nga may kaugalingon nga bank account nga nakapangalan sa nanghuwam, didto sa Land Bank of the Philippines o sa mga mga bangko nga naay serbisyo sa PESONet o InstaPay, nga kasudlan sa SB Corp sa tibuok kantidad sa gihuwam.

 Matud sa SB Corp, dili sila moproseso kon wala pa mahipno sa nanghuwam ang mga detalye kabahin sa bangko nga agi-an sa huwam.

Hinuon, sa mga gagmay nga huwam nga ubos ra sa P30 mil, mahimo ra nga ang account adto sa electronic money accounts sama sa GCash, MayMaya, basta sa pangalan sa aplikante ug dili na kini mahimong usbon pa samtang nag proseso na ang SB Corp.  

Kadtong manghuwam sa CARES 2, kinahanglan usab mag-andam na daan sa tulo ka hulagway sa negosyo ug mga kabtangan niini lakip na ang nakasuwat nga ngalan sa negosyo (business signage) ug  ang mga hulagway dili molapas sa 2 MB, ug lain nga 1 ngadto sa 3 ka minutos nga video sa pagpadagan sa negosyo samtang ang aplikante maghimog pagpasabut sa iyang produkto, serbisyo, kinsay mamalitay, kinsay suppliers, kadaghanon sa halin ug mga gisweldohan nga empleyado.

Kon pananglitan ang nanghuwam, aduna pay wa mabayri nga huwam sa wala pa mag COVID, gikan sa usa  ka financial institution, (FI), gikinahanglan niya nga moduso sa aprobado nga kasabutan sa pagbinayranan nila sa FI, o dili aprobahan ang huwam sa SB Corp.

Gani, dugang sa sa SB Corp nga mas paspas ang pagaproba kon makahatag ang aplikante sa SSS registration sa empleyado isip basehan sa kadaghanon sa empleyado, BIR financial statements sa 2019, agi og basehan sa halin ug ginansya.

Alang sa dugang kasayuran, tawag sa Pundo sa Pagbabago at Pag-asenso (P3) toll free hotline 1800 10 651 3333.  (rahchiu/PIA-7/Bohol)