Ni Elvira Bongosia, PIA
Gipahibalo sa Commission on Elections (Comelec) nga ipadayon na ang voter registration sa nasod sa Setyembre 1, 2020.
Matud pa ni James Jimenez, tigpamaba sa Comelec nga ipadayon ang voter registration sa tibuok nasod gawas lamang sa mga lugar nga gipaubos sa enhanced community quarantine (ECQ) o modified ECQ.
Giingong awtomatikong ibalik ang voter registration kun i-ubos ang quarantine classification sa general community quarantine (GCQ), modified GCQ o kun tangtangon na ang quarantine sa usa ka lugar.
Samtang awtomatiko usab nga isuspinder ang voter registration kun ibalik ang usa ka lugar sa ECQ o MECQ.
Mahimong moduso og aplikasyon alang sa registration matag adlaw nga Martes hangtod Sabado sa Office of the Election Officer (OEO) gikan alas 8:00 sa buntag hangtod alas 3:00 sa hapon.
Gi-awhag sa Comelec ang mga magparehistro nga i-download lamang ang application forms sa www.comelec.gov.ph.
“It is strongly recommended that downloaded forms be filled out before going to the COMELEC office for registration… but the forms should be signed only in front of the Election Officer, at the COMELEC office,” matud pa sa pahayag ni Jimenez.
Gipahibalo usab niini nga magpatuman og anti-COVID precautions sa tanang buhatan sa Comelec lakip na niini ang paglimita sa gidaghanon sa mga pasudlong aplikante sulod sa opisina sa Comelec aron masiguro nga masunod gayud ang physical distancing.
Matud pa nga angay magsuot usab ang matag aplikante og face mask ug face shield ug gi-awhag ang mga aplikante nga magdala og kaugalingon nilang ballpen.
Kinahanglan usab nga may tubagon ang ‘Coronavirus Self-Declaration Form’ nga magbutyag sa impormasyon kalabot sa travel, contact sa mga tawo nga nahibaw-ang may COVID-19 infection, ug mga simtomas nga nasinati.
Matud pa usab ni Jimenez nga dili nila tugotang makasulod sa opisina sa Comelec ang bisan kinsang may nasinating sintomas sa makatakod nga sakit.
Samtang moagi sa express lane ang mga senior citizen, person with disabilities ug buntis.
Giseguro usab sa buhatan nga magpahigayon sila og disinfection ug decontamination sa tanang opisina sa Comelec matag adlaw. (ecb/PIA7-Bohol)