Ni Elvira Bongosia, PIA
Giseguro ni Presidente Rodrigo Roa Duterte nga manubag gayud ang mga opisyal nga nalambigit sa korapsyon sa Philippine Health Insurance Corporation (PhilHealth).
Sa iyang televised public address Martes sa buntag, Agosto 25, miingon si Duterte nga siya mismo ang mag-endorso ug mopirma sa ipasang-at nga reklamo batok sa mga korap nga opisyal.
Sa pagkakaron, miingon ang pangulo nga pasagdan una niyang motuyok ang gipahigayong imbestigasyon ni Department of Justice (DOJ) Kalihim Menardo Guevarra kauban ang mga miyembro sa gimugnang task force.
Ang namugnang task force gipamunoan sa DOJ kauban ang uban pang ahensya sa gobyerno.
Gipahayag ni Duterte nga sa nahabiling duha ka tuig sa iyang termino, gusto niyang mahurot ang mga korap nga opisyal sa PhilHealth.
Sa maong televised public address, gipasalig usab sa presidente nga seguradohon niyang ang tanang pondo sa gobyerno nga gigahin alang sa pagsumpo sa coronavirus disease 2019 (COVID-19) sa nasod, naihap ug nagamit og sakto. (ecb/PIA7-Bohol)