Tuki-on sa Technical Vocational Education and Training (TVET) webinars ang mga hisgutanan ug hagit TVET ngadto sa bag-o nga normal ug sa digital nga Kalibutan, sa usa sa mga kalihukan sa ika 26 ka tuig nga anibersaryo sa Technical Education and Skills Development Authority (TESDA).
Kasaulogan nga magsagop sa tema nga TESDA @26: Bringing Hope in Times of Crisis, usa sa mga labing dagko nga hagit sa nag-una nga technical ug vocational training institution sa kagamhanan ang pagsanong sa hagit sa bag-ong normal sa pagbansay ug panarbaho-an ug ang pagsangkap sa mga trabahante sa natad sa teknikal og vocational nga buhat taliwala sa naglukop na nga digital nga bag-ong panarbaho-an.
Alang niini, ang web conference o web seminar (webinar) nga himoon sa upat ka serye, buksan sa Agosto 27 sa alas 2:00 ngadto sa alas 4:30 sa palis sa Zoom ug dungan nga isibya sa facebook ug youtube, isip ilang unang hukad, sa mga higsutanan nga maggiya sa pagpadagan sa mga bansay ug pagpahiluna sa mga nabansay nga trabahante sa kalibutan nga nagtamud na sa bag-ong normal.
Tema sa upat ka sunod sunod nga mga webinar mao ang “Survive, Revive, Thrive: Transforming TVET Towards the New Normal and the Digital Future.”
Matud pa sa tinubdan gikan sa TESDA, ang webinar kabahin sa mga bag-ong palisiya sa TVET nagtumong sa pagpalatad sa usa ka lugar diin makapasugod sa paghisgut-hisgut sa kasamtangan nga mga hagit sa TVET ug sa mga sector nga nagasalig sa industriya.
Tubagon usab sa nahisgutan nga webinar ang pagtuki sa mga palisiya, pamaagi ug mga lakang nga himoon sa ahensya sa paghikot sa TVET isip pwersa nga magpadangat sa nasud ngadto sa ekonomikanhon nga pagpahiuli ug ang pagsugat sa unsay bag-o nga normal ug sa ika upat nga Industral Revolution.
Gilauman sa TESDA nga makig-uban kanila niining webinar series ang TVET ug ang sector sa mga tunghaan, nga nasudnong ahensya nga may kalambigitan niining hisgutanan, mga Non Government Organizations ug mga katambayayong sa mga TVET.
Gawas sa mga webinar, himoon usab sa TESDA sa binuksan nga adlaw sa kasaulogan ang hiniusang pag-sa sa bandila, misa sa anniversary nga himoon online, mga programa sa pagpakaon sa mga lugar nga nagkalisud, employees awards, program proper sa Agosto 27 ug ang paglusad sa mga proyektong pangkaugmaran sa mga barangay nga prayoridad sa matag probinsya o rehiyon.
Alang sa TESDA, maghimo ug online nga pakontes sa pagkuhag hulagway, skills Olympics sa Skills Mo, Flex Mo, samtang manghatag usab ang ahensya sa ilang mga sakop sa libre nga face mask, face shield, vitamins ug bakuna agi og paghandum sa ilang ika 26 ka tuig nga kasumaran. (rahchiu/PIA-7/Bohol)