Ni Rey Anthony H. Chiu, PIA
Subli nga gipahinumdom sa Department of the Interior and Local Governments (DILG) ngadto sa mga lokal nga kagamhanan nga modawat sa manguli nga mga Locally Stranded Individuals (LSI) nga duha lamang ka dokumento ang kinahanglan nga pangayoon aron madawat na ang pagpapauli sa mga nangatanggong.
Sa usa ka advisory nga gipadala ngadto sa mga gobernador, mayor sa mga syudad, DILG regional ug Provincial Directors, gipahinumdom sa DILG pinaagi ni Assistant Secretary for International Relations and other Interior Sector Concerns Marcelo Morales nga Medical Clearance Certificate ug Travel Authority lamang ang kinahanglan aron makabyahe ang LSI.
Subay usab sa Department of Health Memorandum No 2020-0180 pinitsahan Abril 16, 2020, gibutyag sa ahensya sa kasanihan na ang paggamit sa Rapid AntiBody Test (RAT) Kits dili mahimong mao ray basehan aron ilhon kon may Covid o wala ang LSI o pasyente.
Pahinumdom sa DOH, bisan pa kon may RAT na, ang Reverse Transcription Polymerase Chain Reaction Test (RT-PCR) pa gihapon ang opisyal nga magkopirmar kon may Covid o wala.
Matud sa DILG, ang pugos nga pagpa-ilawom sa RAT, gawas nga dugang kining pinansyal nga palas-anon sa mga LSI nga mo byahe, kini usab maoy kasagarang makalangan sa LSI sa pagkuha sa uban nga mga dokumento nga gipangayo aron makauli na gayud.
Dugang sa DILG, gawas nga ang RAT wala malakbiti sa mga polisiya aron sa pagdumala sa mga LSI, ang DOH una na nga mipadayag nga ang paggamit sa RAT, gawas nga kinahanglan kining kuygan sa RT-PCR, dili usab kasaligan ang iyang resulta.
Tungod niini, mandu dalang pahinumdom sa DILG ngadto sa mga LGUS nga modawat sa mga manguli nga LSI, nga ang RT-PCR testing himoon na sa mga LGUs diha nga moabut na ang LSI sa ilang LGU nga uli-an.
Dugang pasabut sa DILG, dili na kinahanglan pa nga magpailawom ang LSI sa RAT ug RT PCR test sa iyang lugar nga gigikanan.
Dugang pa sa DILG, ang LGU nga modawat sa LSI mao nay moabaga sa bayad sa pagpailawom sa LSI sa RT-PCR.
Niini, ubos sa Refined Policy Guidelines on the Management of LSIs, mahimo ang mga LGUs nga mangayo aron kahatagan sa PCR test Kits kon gikinahanglan, gikan sa National Task Force. (rahc/PIA-7/Bohol)