Ni Rey Anthony H. Chiu, PIA
Sa mga lugar nga delikado nga dili ikapatuman ang social distancing ug may mas dako nga posibilidad nga may makatakud, gitambagan sa World Health Organization (WHO) ang mga tawo nga may daan na nga mga suliran sa lawas, may mga sakit ug mga edaran na sa pagsu-ot, dili sa ordinaryo nga maskara nga panapton, apan medical o surgical mask.
Matud sa WHO, ang mga tawo nga nag-edad og 60 pataas ug mga tawo nga may daan na nga mga sakit sama sa sakit sa kasingkasing, diabetes, sakit sa baga, cancer, cerebro vascular nga sakit sama sa stroke, mas importante ang mga dugang nga proteksyon nga ikahatag sa medical o surgical masks.
Ang medical o surgical mask kadtong mga matang sa mask nga gigamit alang sa medical ug surgical nga procedures nga mahimong flat o gipilo-pilo, mahimong may mga bangan aron ikahikot palibot sa ulo o isab-it sa dunggan.
Kini nga mga maskara, segun pa sa WHO, miagi sa mga sumbanan sa pagtesting sa American Society for Testing and Materials (ASTM F2100) alang sa medical masks o sa European Standards (EN 14683) alang sa bacterial o viral filtration ug nakapasar sa taas nga pagsarap, igo nga pagginhawa sa nagsul-ob niini ug pagpugong sa pagsurop sa tubig ug mga basabasa.
Kini usab ang susamang tambag sa WHO sa mga tawo nga may mga gipakita nga timailhan sa lawas nga parehas sa mga simtomas sa COVID sama sa sip-on, ubo, hilanat ug uban pang mga sakit sa baga.
Kini, dili lamang aron makapanalipod kanila, apan usab makapanalipod sa ubang tawo nga ilang ikauban, segun sa WHO.
Source control, ug dili kayo alang sa self protection, dugang pa sa WHO.
Sa Bohol diin may mga lugar nga may nahitabo nga lokal nga pagpanakodtakod, o gidudahang may lukop nga pagpanakod ug sa mga lugar nga walay kapasidad nga ikapatuman ang mga lakang sa pagpugongsa kagaw sama sa physical distancing, contact tracing, tukma nga testing, pagpailawom sa pagla-in sa gituohang natakdan ug sa mga kompirmado nga kaso, kadtong maskara nga panapton, igo na.
Segun sa WHO, alang sa general population nga naa sa mga pagpubliko nga tapokanan sama sa grocery stores, malls, sa trabaho-anan, social gatherings, mass gatherings, bisan sa mga sirado nga lugar sama sa mga tunghaan, simbahan o moske, alang sa possible nga pagpugong sa kaugalingon nga dili makatakod, mahimo ra nga kadtong mask nga panapton nga may igo nga filter.
Hinuon, girekomendar ang filtering facepiece respirators (FFR), o respirators, nga may mas daku nga kapasidad sa pagsikop sa mas gagmay nga particles alang sa medical health worker nga naghimo og pagpangspray sa mga lugar nga dunay gidudahan nga mga kagaw sa COVID, o sama sa mga isolation facilities nga gipuy-an sa mga kompirmadong may COVID. (rahc/PIA-7/Bohol)