Ni Elvira Bongosia, PIA
Gi-uswag pa sa Bureau of Internal Revenue (BIR) hangtod sa Setyembre 30, 2020 ang pagparehistro sa mga online sellers.
Base kini sa Revenue Memorandum Circular No. 92-2020 nga gipagawas sa BIR nga nag-uswag pa sa deadline sa business registration sa tanang naa sa online o digital nga transaksyon ubos sa Revenue Memorandum Circular (RMC) Nos. 60-2020 ug 75-2020.
Matud pa nga gi-uswag ang registration sa online sellers tungod na usab sa pagdagsa sa mga nagparehistro aron mogokod sa unang gitakdang deadline kaniadtong Setyembre 1 sa pagsumiter og aplikasyon tungod sa kakulang nila sa mga kawani o manpower.
Giingong gamay lamang ang mga kawani o personnel sa BIR dili susama sa ubang ahesya sa gobyerno aron masunod ang health safety protocol batok sa pagkuyanap sa coronavirus disease (COVID-19).
Gitambagan ni BIR Commissioner Caesar Dulay ang tanang mga naa sa online o digital nga transaksyon sa pagparehistro sa ilang aktibidad sa negosyo sa dili pa ang petsang Setyembre 30 aron dili magmulta alang sa late registration.
Matud pa ni Dulay nga ang penalties, tangtangon alang sa mga nagdeklarar sa niaging transaksyon ug nagbayad og tukmang buhis.
Kahinumdoman nga una nang nagpagawas og abiso ang BIR nga hangtod Agosto 31 na lamang ang deadline sa pagparehistro sa mga online sellers apan tungod kay natunong sa holiday sa National Heroes Day, gisibog kini sa Setyembre 1.
Apan gi-uswag na usab kini tungod na usab sa wala damhang pagdagsang sa mga gustong magparehistro ug aron maabot ang kakulang sa revenue sa mga district offices. (ecb/PIA7-Bohol)