Ni Elvira Bongosia, PIA
Nagpadayon na ang voters’ registration sa lalawigan sa Bohol sugod Martes, Setyembre 1 diin gipahimutang usab ang mga lagda sa health safety protocols sa Commission on Elections (Comelec).
Matud pa ni Provincial Election Supervisor Atty. Eliseo Labaria, ang mga nagplanong magparehisto kinahanglang magsuot og face mask og face shield inig sulod sa ilang buhatan.
“Strikto na. Dili kasulod og wala kay face mask ug wala kay face shield,” matud pa ni Labaria.
Sa pagsulod sa buhatan sa Comelec, susihon ang temperatura sa mga mosulod gamit ang thermal scanners, samtang may health declaration forms usab nga angay tubagon.
Gi-awhag ang mga magparehistro sa pag-download sa forms online ug tubagon kini una sa dili pa moadto sa buhatan sa Comelec.
Kinahanglang moadto linawas sa buhatan sa Comelec ang mga magparehisto alang sa ilang biometrics.
Gawas sa pagparehistro, mahimo usab magpabalhin og registration ug magpailis o correction of entry.
Matud pa ni Labaria nga ang ilang buhatan sa Comelec bukas alang sa registration sa mga adlaw nga Martes taman Sabado apil ang mga holidays gikan alas 8 sa buntag taman alas 3 sa hapon.
Ang rehistrasyon magpadayon hangtod sunod tuig apan gi-awhag ni Labaria ang publiko nga dili magpaabot sa deadline aron malikayan ang pagponsisok sa ilang mga buhatan, nga maoy gilikayan sa pagpugong sa pagtakod-takod sa sakit. (ecb/PIA7-Bohol)